"Grand Slam Tashkent - 2021". Вакилларимиздан яна 3 таси ғалабага эришди

Айни дақиқаларда, Тошкент шаҳридаги "Ҳумо Арена" спорт саройида дзюдо бўйича "Катта дубулға" турнири бўлиб ўтмоқда. Дастлабки босқичлар доирасидаги навбатдаги жангларда вакилларимиз бир қатор ғалабаларни қўлга киритди. 

-73 кг вазн тоифасидаги дзюдочимиз Муроджон Йўлдошев биринчи босқич баҳсида италиялик Жиованни Эспозитони иппон баҳоси билан мағлубиятга учратди. Энди Муроджон иккинчи даврада украиналик Артём Хомулага қарши татамига чиқади.

-73 кг вазн тоифасидаги дзюдочимиз Ғолибжон Сулаймонов Тошкент "Катта Дубулға" турниридаги иштирокини ғалаба билан бошлади.

Сулаймонов биринчи даврада болгариялик Марк Христовга қарши баҳс олиб бориб, ғалабага эришди. Ғолибжон иккинчи босқичда украиналик Александр Кошляк билан татамига чиқади.

Ушбу босқич доирасида қизларимиздан Шоҳиста Назарова мусобақа билан эрта хайрлашишга мажбур бўлди. Муросасиз курашда Назарова грузиялик Марьям Тчантурияга кичик ҳисобда имкониятни бой бериб қўйди. 

Мусобақа давом этмоқда.