Грандларни “ер тишлатаётган” клуб устози уларга чемпионлик керак эмаслигини айтди

Англия Премьер-лигасининг жорий мавсумида Унаи Эмери бошқараётган “Астон Вилла” ўйин услуби ва натижалари билан мухлису мутахассисларни ҳайратга солмоқда.

Чемпионатнинг 17-турида “виллаликлар” ўз майдонида “Манчестер Сити”ни 2:1 ҳисобида енгиб, қаторасига еттинчи ғалабасини нишонланди ва очколари сонини 36 тага етказиб, учинчи ўринга кўтарилди.

“Астон Вилла” пешқадам “Арсенал”дан уч, иккинчи ўриндаги “Манчестер Сити”дан бир очкога ортда қолмоқда. Лекин Унаи Эмери шогирдлари чемпионат давомида ҳар икки жамоани ҳам тиз чўктиришни уддалаган.

Шунга қарамай, Унаи Эмери жамоаси чемпионлик учун даъвогар эмаслигини таъкидлагани кўпчиликни ҳайрон қолдирди.

-  Агар реалист бўлсак, бизда қобилият ва салоҳият бор, биз “Арсенал” ва “Манчестер Сити” каби жамоаларга қарши кўп ўйнаганмиз. Албатта, биз уларни мағлуб этганмиз, аммо улар бунчалик кўп юқори савияли ўйинчилар билан улкан тактик устунликка эга. Бизда ҳам яхши ўйинчилар бор, лекин бундай жамоалардан олдинда бўлиш, нореал ҳолат.

Биз бош совринга даъвогар эмасмиз. Жадвалнинг юқори қисмидамиз, чунки ажойиб курашяпмиз. Ўйинчилар ҳар бир ўйинга чин дилдан диққат қаратяпти, барқарормиз ва кўрсатмаларга амал қиляпмиз. Лекин биз лигада ғалаба қозониш учун даъвогар эмасмиз.

Албатта, биз ушбу уч йил давомида озми-кўпми барқарорликка эришдик ва Еврокубоклар зонасидан жой олдик, лекин биз камтар бўлишимиз ва кейинчалик ҳам шу тарзда қандай очко тўплаш мумкинлигини тушунишимиз керак. Биз ақлли, курашувчан, барқарор ва ўзимизга нисбатан талабчан бўлган ҳолда ушбу даражани сақлаб қолмоқчимиз. Шу туфайли биз юқорида бўламиз, - деди Унаи Эмери Sky Sports нашрига.