Грилишга АПЛнинг гранд клубидан харидор чиқди

“Манчестер Сити” футболчиси Жек Грилишга Англия Премьер-лигасининг “Тоттенхэм” клуби жуда катта қизиқиш билдирмоқда. 
 
Бир неча кун олдин кореялик ҳужумчи Сон Хён Мин жамоа билан шартномасини узайтирмаслиги ҳақида миш-мишлар тарқалган эди. Шу сабабли, клуб мутасаддилари футболчи ўрнига янги ҳужумчи излашни бошлаб юборишган. 
 
“Football365” нашрининг хабар беришича, англиялик ҳужумчининг бу мавсумдаги муваффақиятсиз ҳаракатлари сабаб “шаҳарликлар” футболчини қишки трансферлар ойнасида сотишга тайёр. Сўнгги кунларда Жек учун “шпорлар” асосий даъвогар сифатида кўрилмоқда. Манбага кўра, “Тоттенхэм” бош мураббийи Постекоглу ҳам бу трансферни шахсан ўзи хоҳлаётганини билдирган. 
  
Маълумот ўрнида, 29 ёшли ҳужумчи бу мавсум “Сити” таркибида 18 та учрашувда майдонга тушиб, 2 бора голли узатмага муаллифлик қилди. Грилишнинг клуб билан шартномаси 2027 йилгача мўлжалланган бўлиб, Тransfermarkt порталидаги нархи 45 миллион евро деб баҳоланмоқда.