Гвардиола “Барселона” юлдузини олиб кетмоқчи

“Манчестер Сити” ёзги трансферлар ойнаси ёпилгунига қадар “Барселона” марказий ярим ҳимоячиси Педрини ўз сафига қўшиб олмоқчи.

Football365 нашрининг маълум қилишича, “шаҳарликлар” бош мураббий  Хосеп Гвардиола 21 ёшли футболчига шахсан қизиқиш билдирмоқда.

Манбага кўра, манчестерликлар Педрини олиш учун каталонияликларга унинг позициясида ўйнайдиган  Матеус Нуньесни беришга тайёр.

Педри “Барселона”нинг энг иқтидорли ўйинчилардан ҳисобланади. Каталонияликлар уни 2019 йили “Лас-Пальмас”дан трансфер қилган.

Педри ёш бўлса-да, профессионал даражада 180 та учрашувда қатнашиб, ўз ҳисобига 24 та гол ва 20 та ассист расмийлаштирган.

“Барселона” президенти Жоан Лапорта ўйинчига жиддий таклифлар бўлаётганига қарамай, Педрини жамоада сақлаб қолишга уринмоқда.