Гвардиола “Барселона”даги собиқ футболчисини чақирган эди

“Манчестер Сити” бош мураббийи Хосеп Гвардиола инқироздан чиқиш учун қишки трансферлар ойнасида “Барселона”даги собиқ футболчиси Серхио Бускетсни жамоага жалб қилмоқчи бўлган. 
 
Хабарингиз бор, сўнгги ойларда испаниялик мутахассиснинг “шаҳарликлар” мураббийлигидаги натижалари қониқарли бўлмаяпти. Шу боис, клуб мутасаддилари қишда жамоага ҳамюртимиз Абдуқодир Ҳусанов, Омар Мармуш, Витер Рейс ва Нико Гонсалес каби ўйинчиларни жалб қилди. 
 
“Daily Express” нашрининг маълум қилишича, мураббий ушбу футболчилардан ташқари, ўзининг собиқ ярим ҳимоячиси ҳисобланган Серхио Бускетсни ҳам жамоага олиб келмоқчи бўлган. Бироқ, “Интер Майами”нинг испаниялик ўйинчиси мазкур таклифни рад этган. Манбага кўра, Гвардиола футболчини жорий мавсумнинг сўнггигача ижарага олмоқчи эди. 
 
Маълумот ўрнида, 36 ёшли ҳавбек “Интер Майами” сафида 60 та ўйинда иштирок этиб, 1 та гол ва 6 та голли узатмага муаллифлик қилган.