Гвардиола Ҳусановнинг “Реал” ва “Ливерпуль”га қарши ўйини ҳақида нималар деди?

Англия Премьер-лигаси 26-турининг энг томошабоп ўйинларидан бири амалдаги чемпион “Манчестер Сити” ва жорий мавсум пешқадами “Ливерпуль” ўртасида бўлди.

Учрашувда Арне Слот шогирдлари 2:0 ҳисобида зафар қучди. Хосеп Гвардиола жамоаси тўп назорат қилишда устунлик қилган бўлса-да, рақиб дарвозасини ишғол қиладиган ўйинчи топилмади.

Мезбонлардан жамоага январда келган Абдуқодир Ҳусанов ва Нико Гонсалес қолганларга нисбатан анча яхши ўйнади. “Эскилар”дан Савиньонинг ҳаракатларини алоҳида таъкидлаш лозим.

Абдуқодир Ҳусанов икки бор Муҳаммад Салоҳ, бир мартадан Луис Диас ва Доминик Собослаининг гол уришига йўл қўймади. Айнан ўзбек легионерининг ҳимоядаги ўйини ҳисобнинг йириклашиб кетишига тўсқинлик қилди.

Учрашув ҳақида фикр билдирган Хосеп Гвардиола “Ливерпуль”нинг устунлиги, жамоасидаги муаммолар ва   Абдуқодир Ҳусановнинг кучли рақибларга қарши ишончли ўйини ҳақида ўз фикр-мулоҳазаларини билдириб ўтди.

- Биз “Ливерпуль”га қарши жуда яхши ўйнадик. Якуний зарбаларни беришда самаралироқ ҳаракат қилишимиз керак эди, бироқ фантастик жамоага қарши ўйнаганимизни ҳам инобатга олиш керак. Ғалаба қозониш учун вазият элликка эллик бўлди, аммо имкониятлардан етарли фойдалана олмадик.

Иккинчи бўлимда рақиб чуқур ҳимояланди. Биз кўп ўйинларда уддалай олмаётган амалиётни эпладик. Яъни,  мақсадимиз рақибни ўз жарима майдончасига қамаб, уларни ўша ерда мағлуб этишга ҳаракат қилиш эди. Шундай бўлди, фақат гол ура олмадик холос.

Агар ютқазадиган бўлсак, бугунгидек ўйнаб ютқазган маъқул. Мен бугунги ўйинчилар билан клубнинг келажаги порлоқ эканига амин бўлдим. Албатта, бунда Кевин де Брюйне ва Натан Акени ҳисобга олмаган ҳолатда, қолган барча футболчиларимиз ҳали навқирон ёшда.

 Бу баҳсда қатнаша олмаган Эрлинг Холанд қачон сафга қайтиши билмайман. Лекин мен норвегиялик тўпураримиз йўқлиги учун натижага эриша олмадик, демайман. Чунки бу бошқа ўйинчиларга нисбатан адолатсизлик бўлади.

Абдуқодир Ҳусанов Мадридда жуда зўр ўйнади. Ўнг қанот ҳимоячиси позицияда ҳаракат қилиб, Винисиус Жуниорни тўлиқ назорат остида ушлай олди. “Ливерпуль”га қарши беллашувда ҳам Абдуқодир тезкор ва тартибли ўйин намойиш қилди.

Албатта, Ҳусанов ҳали ривожланиши ва янада ўсиши талаб этилади, унинг ғайритабиий қобилиятлари бор.

Янги ўйинчилардан Нико Гонсалес ва Умар Мармуш ҳақида ҳам фикрларим шунақа. Уларнинг жисмонан кучли рақибга қарши ўйини осон кечаётгани йўқ, - деди Хосеп Гвардиола.

Таъкидлаш жоизки, “Манчестер Сити” январь ойида янги ижрочилар трансфери учун 200 миллион евродан ортиқ харажат қилиб тўрт ўйинчини қўлга киритган эди. Қишки трансферлар ойнаси даврида жамоага қўшилган ҳимоячи Абдуқодир Ҳусанов, ярим ҳимоячиси Нико Гонсалес ва ҳужумчи Умар Мармуш мунтазам ўйин амалиётига эга бўлмоқда.

Бразилиянинг “Палмейрас” клубидан таклиф этилган 18 ёшли марказий ҳимоячи Витор Рейс эса, Европа футболига мослашиш ва тажриба ошириш амалиётини бошдан ўтказяпти.

“Манчестер Сити” раҳбарияти таркибни янгилаш ва кучайтириш ишларини ёзги трансферлар ойнаси даврида ҳам давом эттиришни режалаштириб қўйган.

Ҳусановнинг Муҳаммад Салоҳ билан “танишиб” олган ўйини қандай баҳоланди?

Гвардиола кетса, Ҳусановга ким устозлик қилади?