Гвардиола ўрнига – Хаби Алонсо!

Мадриднинг “Реал” клуби бош мураббийи бўлиб ишлаган Хаби Алонсо яқин келажакда “Манчестер Сити”ни бошқариши мумкин. Испаниялик мутахассис “шаҳарликлар”нинг ҳозирги мураббийи Хосеп Гвардиоланинг ўрнини эгаллаши мумкин бўлган мутахассислар рўйхатига киритилди.

Бу ҳақда Footballtransfer хабар бермоқда.

Манба маълумотларига кўра, Гвардиоланинг келажаги ҳозирча ноаниқ бўлиб турибди. Унинг манчестерликлар билан амалдаги шартномаси 2027 йилнинг ёзигача амал қилади.

Шунга қарамай, сўнгги пайтларда испаниялик мутахассис жорий мавсум охирида клубни тарк этиши мумкинлиги ҳақидаги миш-мишлар кучайган.

Ўз навбатида, “Реал” раҳбарияти Алонсо билан ҳамкорликни тўхтатганидан кейин испаниялик мутахассис ўзига бўладиган таклифларнинг ҳар бирини пухта ўрганиб чиқиши аниқ.

Гвардиола 2016 йилдан бери “Манчестер Сити”ни бошқариб келмоқда. Алонсо эса “Реал”ни ўтган ёз қабул қилиб олди, бироқ жамоада “Қироллик клуби” кутган ижобий ўзгаришларни ясай олгани йўқ.