Гвардиола ўрнига икки нафар зўр мураббий бор

“Манчестер Сити”нинг спорт директори Уго Виана бош мураббий Хосеп Гвардиолага ўринбосар топиш устида фаол иш олиб бормоқда ва номзодлар рўйхатини қисқартирмоқда.

Гвардиоланинг шартномаси 2027 йил ёзигача амал қилади. Аввалроқ, Англия оммавий ахборот воситаларида испаниялик мутахассис жорий мавсум охирида клубдан кетиши мумкинлиги ҳақида хабарлар чиққан эди.

Манбага кўра, асосий номзодлар сифатида қуйидагилар белгиланган:

• Венсан Компани (“Бавария” бош мураббийи),
• Энцо Мареска (“Челси” собиқ бош мураббийи).

Бироқ клуб Марескага устунлик бермоқда. Унинг тактик ёндашуви ва жамоа ўйин услубини яхши тушуниши юқори баҳоланмоқда.

Шунингдек, Маресканинг бирор клуб билан амалдаги шартномаси йўқлиги ҳам унинг устунликларидан бири ҳисобланади. Италиялик мутахассис 2022–2023 йилларда “Манчестер Сити”да ёрдамчи мураббий бўлиб ишлаган ва клуб ички муҳитини жуда яхши билади.