Гвардиола “Реал”га қарши учрашув ҳақида: “Агар футболчиларимиз камбэк қилишимизга ишонишмаса, уйларига кетаверишсин”

"Манчестер Сити" бош мураббийи Хосеп Гвардиола Европа Чемпионлар Лигасида "Реал"га қарши бўлиб ўтадиган жавоб ўйини ҳақида фикр билдирди. Жамоаларнинг дастлабки учрашуви Испания клубининг 3:0 ҳисобидаги ғалабаси билан якунланди.

"Агар футболчилар (учта тўп фарқни йўққа чиқаришга) ишонмаса, бу уларнинг муаммоси. Улар катта одамлар, маошлари яхши. Чемпионлар Лигаси учун ишонишмаётган бўлса, уйларига кетаверишсин, уйда қолишсин. Биз ҳаракат қилишимиз керак. Нима йўқотамиз?

Албатта, бу ёқимсиз натижа. Лекин биз ҳаракат қилишимиз керак, одамларга, мухлисларга, ўз ишимизга ҳурмат юзасидан, тушуняпсизми?

Бу футбол ва ҳар нарса бўлиши мумкин. Концентрацияни сақлаб, аввал шунчаки ғалаба қозонишга ҳаракат қилишимиз керак, кейин эса кўрамиз. Биз мухлисларимизнинг қўллаб-қувватлаши билан яхши ўйин кўрсатишимиз керак ва умид қиламанки, улар бизга куч беради. Бунинг учун бор кучимизни ишга соламиз", - деб Гвардиоланинг сўзларини келтирди ESPN.

Жавоб учрашуви эртага, 17 март куни Манчестер шаҳридаги "Этиҳад" стадионида бўлиб ўтади.