Гвардиола Родрининг ўрнига январда “Реал” юлдузини олиб келишни талаб қиляпти

“Манчестер Сити” жароҳат туфайли етакчи ўйинчилари, хусусан, таянч зонани мустаҳкам ушлаб турадиган Родридан айрилганидан кейин кетма-кет тўрт маротаба мағлубиятга учради.

Ўз фаолияти давомида илк бор мағлубиятлар сериясига илиниб қолган Хосеп Гвардиола жамоани кучайтириш учун “Реал”дан футболчи олишни истаяпти.

Испаниялик мутахассис клуб раҳбариятидан қишки трансферлар вақтида “Реал” ярим ҳимоячиси Федерико Вальвердени олиб беришни сўраяпти.

Fichajes нашрининг ёзишича, “шаҳарликлар” устозига уругвайлик футболчининг таянч зонада ўйнашдан ташқари ҳужум қилиш қобилияти ҳам манзур бўлмоқда.

Шунга қарамай, манчестерликларга универсал футболчини трансфер қилиш осон бўлмайди. Чунки Вальверде мадридликларнинг энг муҳим ўйинчиларидан ҳисобаланади ва “Реал” раҳбарияти 26 ёшли ярим ҳимоячи бўйича ҳар қандай таклифни рад этиши мумкин.