Гвардиола “Сити”дан кетадиган марказий ҳимоячи номини айтди. У Ҳусановми?

“Манчестер Сити” чемпионат якунланишига учта учрашув қолган паллада келаси мавсум учун Европа Чемпионлар лигаси йўлланмасини нақд қилишга жуда яқин турибди.

Хосеп Гвардиола гарчи ўзида тўрт йил сақлаб келган чемпионлик унвонини бу гал “Ливерпуль”га бой берган бўлса-да, жамоасини мавсумнинг биринчи қисмида кузатилган инқироздан олиб чиқиб кета олди.

Испаниялик мутахассис юзага келган муаммолар ечимини таркибни янгилашда кўрди. Клуб янги трансфер сиёсатига кўра, жамоани ёшартиришга қарор қилди. Ўзгаришлар январь ойидан бошланди ва жамоага Абдуқодир Ҳусанов, Витор Рейс, Нико Гонсалес ва Умар Мармуш каби янги ўйинчилар  олиб келинди.

Хосеп Гвардиола янги жанговар жамоа ташкил қилиш йўлида ўзига қадрдон бўлиб қолган тажрибали ўйинчилардан воз кечишига тўғри келмоқда. Хусусан, кейинги пайтда “шаҳарликлар”га қимматбаҳо очколарни келтираётган Кевин де Брюйне 30 июнь куни эркин агентга айланиши ҳал бўлган масала. “Милан”га ижарага юборилган собиқ сардор Кайл Уокер ҳам Манчестерга қайтарилмайди.

Дарвозабон Эдерсон, ҳужумкор футболчи Бернарду Силва  ва яна айрим тажрибали ўйинчилар ҳозирдан ўзига янги жамоа қидирмоқда.

Fichajes порталининг хабар беришича, Хосеп Гвардиола марказий ҳимоячилар таркибини ҳам тозалашга қарор қилди. Испаниялик мутахассис кейинги пайтда ўйин амалиётисиз қолаётган Абдуқодир Ҳусановдан эмас, тажрибали Дон Стоунздан воз кечишни истаяпти.

30 ёшли футболчи жорий мавсумда саломатлигидаги муаммолар ва жароҳатлар туфайли “шаҳарликлар”га етарли даражада ёрдам бера олмади. Гвардиола бу ўйинчи бўйича ҳам ўзгариш қилиш керак, деган фикрга келди.

Англиялик ҳимоячи “Эвертон”даги ёрқин ўйинларидан кейин 2016 йили “Манчестер Сити”га олиб келинган ва узоқ муддат давомида Гвардиола жамоасининг ҳимоя қўрғони бўлиб келган эди. Стоунз асосий амплуаси марказий ҳимоячи бўлишига қарамай, мудофаа чизиғининг турли нуқталарида ўйнай олиши уни жамоа етакчисига айлантирди.

Бироқ жорий мавсумда Жон Стоунз “Манчестер Сити”нинг йигирмата учрашувида майдонга туша олди холос ва  ўйин даражаси аввалги йиллардан анча пасайиб кетгани намоён бўла бошлади. Қолаверса, “Манчестер Сити” янги эрани бошлаш остонасида таркибда ёш, бақувват, тезкор ва курашувчае футболчиларни жамлашга қарор қилган.

Клуб янгича трансфер сиёсатини юритиш учун спорт директорлигига Уго Вианани таклиф қилди. Бу мутахассисга янги таркиб шакллантириш ваколати берилди. Виана ишни ёзда амалга ошириладиган трансферлар учун жой очишдан бошлайди.

Табиийки, Жон Стоунз даражасидаги ҳимоячи ишсиз қолмайди. “Сити” билан яна бир йиллик шартномаси қолган ўйинчини “Эвертон” ортга қайтармоқчи. “Вест Хэм” Стоунз тажрибасига таяниб, ҳимоя чизиғини мустаҳкамлашни режалаштирган. Қолаверса, Жонга Англия ва Европа ташқарисидан ҳам таклиф ва чорловлар етарли.

Бу борада кўп нарса “Манчестер Сити” Стоунз учун қанча миқдорда бадал пули талаб қилиши ва ҳимоячининг қанча маош сўрашига боғлиқ бўлади.

Ҳусановни ўйнатмаётган Гвардиола “Сити”дан кетишини айтди!

Раньери Шомуродов ҳақида жиддий гапларни айтди!