Ҳусановни ўйнатмаётган Гвардиола “Сити”дан кетишини айтди!

3 май, 06:57
Zohir Toshxo’jayev
1
Футбол

Қишки трансферлар даврида “Манчестер Сити” ўз таркибига Абдуқодир Ҳусановни қўшиб олганидан кейин “шаҳарликлар”га ишқибозлик қиладиган ўзбекистонлик футбол мухлислари сони кескин ошди.

Ҳамюртларимиз Абдуқодир ҳурматидан Хосеп Гвардиола жамоасига оид хабар, янгилик ва таҳлилларни алоҳида қизиқиш ва эътибор билан кузатиб келмоқда.

Айни пайтда “Манчестер Сити” таркиби қайта шаклланиш жараёнини бошдан кечирмоқда. Ҳар куни турли манбалар томонидан “шаҳарликлар”га оид маълумотлар тарқатиляпти.

Sports.uz портали “Манчестер Сити” фаолиятига тегишли маълумотларни ўзбекистонлик футбол ишқибозлари эътиборига ҳавола этишни маъқул топди.

Родри қачон ўйнайди?

Футбол оламидаги энг нуфузли индивиуал соврин – “Олтин тўп”нинг амалдаги соҳиби Родри оғир жароҳат туфайли мавсумнинг катта қисмини ўтказиб юборди.

“Манчестер Сити” мухлисларини испан футболчисининг қачон майдонга қайтиши қизиқтириб келади. Бош мураббий Хосеп Гвардиола бу масалага ойдинлик киритди.

- Машғулотларни бошлаб юборган Родри шифокрлар унга рухсат бериши билан ўйнай бошлайди. Мени бу ҳақда шахсан хабардор қилишлари айтилган.

Ҳозир Родри ўзини жуда яхши ҳис қиляпти, мунтазам машғулотларни ўтамоқда, лекин биз уни дарров майдонга тушириб, таваккалга қўл ура олмаймиз, - деди Хосеп Гвардиола.

2024 йилги “Олтин тўп” соҳиби жорий мавсумда Англия Премьер-лигасида атиги иккита учрашув ўтказиб, тиззасидан олган жароҳати туфайли узоқ муддат даволанишда бўлди.

Кевин де Брюйнени қуруқ жўнатмаймиз!

“Манчестер Сити” қанот ҳужумчими Жереми Доку мавсум якунлангач, жамоани тарк этадиган Кевин де Брюйне ҳақида ўз фикр-мулоҳазаларини билдириб ўтди.

- Кевин – “Манчестер Сити” афсонаси. Бельгиялик плеймейкер бу жамоада жуда кўп совринларни қўлга киритган. У клубдан кетса ҳам, ёрқин таассуротлар қолади.

Мухлислар уни қаттиқ ҳурмат қилади ва бу унинг натижаларини инобатга олганда, табиий ҳол.

Кевин де Брюйне ҳозир жамоадагиларнинг барчасидан, хатто Хосеп Гвардиоладан олдин Манчестерга келган. У ҳурмат ва эҳтиромга лойиқ ҳақиқий афсона.

Олдинда Англия кубогининг финали бор. Биз Кевин де Брюйне клубдан айнан мана шу совринни қўлга киритган ҳолда кетиши учун бор кучимизни берамиз, - деди Жереми Доку.

Эслатиб ўтамиз, Кевин де Брюйне “Манчестер Сити”га 2015 йили келган. Унинг амалдаги шартномаси 30 июнь куни ўз ниҳоясига етади.

Гвардиола футболдан чарчади!

“Манчестер Сити” бош мураббийи Хосеп Гвардиола клубдан қачон кетиши ва шундан кейин нималар билан шуғулланиши ҳақида гапирди.

- Одамлар мени ўзлари қандай истаса, шундай эслаб қолсин. “Сити” билан ҳамкорлик шартномам тугаши билан мен кетаман. Бунга аминман.

Шундан кейин мураббийлик фаолиятимни якунлайманми ёки йўқ, буни аниқ билмайман. Бироқ танаффус қилишим аниқ. Мени қай тарзда эслаб юришларининг аҳамияти йўқ.

Ҳар бир мураббий ғалаба қозонишни истайди, ўзидан яхши ном қолдиришга уринади. Мен “Барселона”, “Бавария” ва “Манчестер Сити” ишқибозлари менинг қўл остимдаги жамоалар ўйинини кузатишдан баҳра олганига ишончим комил, - деди Хосеп Гвардиола.

Таъкидлаш жоизки, испаниялик мутахассис ноябрь ойида клуб билан амалдаги шартномасини яна икки йилга узайтириб, 2027 йилнинг ёзигача “Этихад” аренада қолишга розилик берган эди.