Гвардиола Тухелнинг Англия терма жамоасига бош мураббий бўлгани ҳақида фикр билдирди

Томас Тухель Англия терма жамоасига бош мураббий этиб тайинлангач, "Манчестер Сити" устози Хосеп Гвардиола Англия терма жамоасини англиялик мураббий бошқариши керакми, деган саволга жавоб қайтарди.

"Биз қаерда туғилишимизни ўзимиз ҳал қилмаймиз. Буни ота-она ҳал қилади ва тўққиз ойдан кейин биз пайдо бўламиз. Мен каталониялик бўлиб туғилишни ўзим хоҳлаганим йўқ, сиз эса инглиз бўлиб туғилишни ўзингиз танламагансиз. Федерация катта обрўга эга хорижлик мураббийни танлади. Мен бу танловни тўлиқ қўллаб-қувватлаган бўлардим. Мураббий ғалаба қозонса, мақташади. Агар у мағлуб бўлса, танқид қилинади. Унинг қайси миллатга мансублиги муҳим эмас. Биламан, ҳар биримиз ўз миллатимиз билан фахрланамиз, лекин дунё жуда катта жой ва биз очиқ фикрли бўлишимиз керак. Кимдир бошқа жойда туғилгани учун танқид қилинишини ёқтирмайман", - деди Гвардиола матбуот анжуманида.