Гвардиола Холанд “Реал”га қарши ўйнамагани сабабини айтди

Европа Чемпионлар лигаси плей-офф босқичи жавоб учрашувида “Манчестер Сити”нинг асосий тўпурари Эрлинг Холанд “Реал”га қарши майдонга тушмади.

“Шаҳарликлар” бош мураббийи Хосеп Гвадиола норвегиялик ҳужумчининг қийин баҳсда жамоасига ёрдам бермагани сабабларини келтириб ўтди.

- Ўйиндан олдин Эрлинг машқ қилишга уриниб кўрди. Холанд “Ньюкасл” билан бўлган беллашувда шикастланган эди.

Тиббий кўрик жараёнида олинган текширув суратлари хавфли нарса йўқлигини кўрсатди. Лекин Эрлинг юрганда ва зиналардан тушиб-чиққанида оёғида оғриқ ҳис қилди. Беллашувдан олдин у ёнимга келиб, ўзини ёмон ҳис қилаётгани ва “Реал”га қарши баҳсга тайёр эмаслигини айтди, - деди Хосеп Гвардиола.

Эслатиб ўтамиз, Эрлинг Холанд Англия Премьер-лигасининг 25-тури доирасида “Ньюкасл”га қарши беллашувнинг 88-дақиқасида тиззасидан жароҳат олгани боис, захирага олинган эди.