Гвардиоланинг ЕЧЛдаги омадсизликлари давом этадими? «Интер»дан «Лион»гача бўлган барча мағлубиятларни ёдга оламиз!

Пеп «Манчестер Сити»ни Европанинг энг кучли 8 жамоасидан бирига айлантирди. Энди олдинда финалга қадар оғир масофани босиб ўтиш даркор. Тўғри, клубга қуръада омад кулиб боқди. Дортмунднинг «Боруссия» жамоаси деярли идеал рақиб, аммо…

Пеп бошқарувидаги клублар сўнгги йилларда ЕЧЛ плей-оффини эрта тарк этишга ўрганиб ҳам қолдик. Хўш, испаниялик мутахассис сўнгги 10 йил ичида қайси жамоалардан сабабли турнирни тарк этди? Бугун барчасини ёдга оламиз.

2009/10 – Гвардиоланинг «Барселона»си «Интер» тўсиғидан ўта олмади (1:3,1:0)

ad1

Гвардиола «Барселона»даги 3 йил ичида 2 бор ЕЧЛда зафар қучди. Ушбу ғалабалар оралиғида битта қоқилиш мавжуд. Эътиборлиси шундаки, ўша мавсумда Пеп шогирдлари «Интер» билан 4 бор майдонга тушганди. Иккитаси гуруҳ босқичида, иккитаси плей-оффда. Ҳал қилувчи учрашувларда «Интер» руҳан яхши тайёрлангани кўриниб қолди. Айнан шу тўқнашувлар сабабли Гвардиола – Моуриньо қарама-қаршилиги юзага келди. Айнан Жозе Пепни мураббийлик фаолиятида илк бор ЕЧЛдан чиқариб юборган мутахассисга айланди.

2011/12- Гвардиоланинг «Барселона»си «Челси»дан ўта олмади. (0:1, 2:2)

Гвардиола ўзининг Каталониядаги сўнгги мавсумида ЕЧЛда зафар қучишни жуда истади. Афсуски, бунга «Челси» қаршилик қилди. Пеп аллақачон «Бавария» билан музокаралар бошлаб қўйган, «Камп Ноу»ни чиройли тарк этиш ниятида эди.

Роберто Ди Матео эса, кутилмаганда катта саҳнага чиқиб келди. Вақтинча мураббий этиб тайинланган йигитча «Камп Ноу»да мўъжиза намойиш этди. Бир киши кам бўлиб ўйнаган «Челси» 2:0 дан сўнг синмади. Аввалига Рамирес Лондон жамоасини ўйинга қайтарган бўлса, сўнгги дақиқаларда Торрес катта саҳнага чиқди.

ad53453

2013/14- Гвардиоланинг «Бавария»си «Реал»дан ўта олмади (0:1, 0:4)

«Барса»дан кетгач, Пеп бир йил футболдан дам олди. Бу орада унинг бўлажак жамоаси Юп Ҳайнкес билан требл қайд этди. Пеп жуда ҳам кучли жамоани қабул қилиб олди, аммо уни янги даражага олиб чиқишни уддалай олгани йўқ.

Ачинарлиси шундаки, Пеп ўзининг Мюнхендаги илк мавсумидаёқ «Реал»дан қақшатқич зарба қабул қилиб олди. «Альянц Арена»даги 0:4 унинг турнирдаги илк йирик мағлубиятига айланди.

2014/15-Гвардиоланинг «Бавария»си «Барселона»дан ўта олмади (0:3; 3:2)

Келаси мавсумда Пеп яна ярим финалга қадар етиб келди, аммо яна аламли мағлубият қабул қилиб олди. «Барселона» Неймар-Месси-Суарес учлиги сабабли Мюнхендан келган меҳмонларни 3 гол билан "сийлади". Жавоб ўйинида «Бавария» шоу намойиш этди, бироқ яна ЕЧЛ финали остонасида тўхтатилди.

ad55

2015/16-Гвардиоланинг «Бавария»си «Атлетико»дан ўта олмади (0:1; 2:1)

Пеп «Бавария» бошқарувидаги 3-ярим финалини ҳам испан клубига бой беради. Диего Симеоненинг «Атлетико»си меҳмонда урилган гол қоидасига кўра ғолиб бўлади. Эътиборлиси шундаки, Пеп ўзининг мураббийлик фаолиятидаги илк йилларида жамоасини ярим финалга қадар бошлаб боришда муаммога дуч келмаган.

2017/18 – Гвардиола бошчилигидаги «Манчестер Сити» «Монако» тўсиғидан ўта олмади (5:3; 1:3)

Англияга кўчиб ўтгач, Пеп кучли рақобатга дуч келди. Ички биринчиликдаги оғир ўйинлар сабабли қаҳрамонимиз 7 йиллик анъанасига чек қўйди. У «Сити»ни ЕЧЛнинг ярим финалига қадар бошлаб боришни уддалай олмади. Чорак финалда камтарин «Монако» «Сити»ни доғда қолдирди. Ёш Мбаппе эса, иккита ўйинда ҳам гол киритиб, инглиз жамоасини мусобақадан чиқариб юборди.

ad343284842

2017/18- Гвардиоланинг «Манчестер Сити»си «Ливерпуль» тўсиғидан ўта олмади (0:3; 1:2)

Ўша мавсумда «Сити» АПЛда 100 очко билан ғалаба қозонди, бироқ халқаро аренада инглиз клубидан аламли мағлубият қабул қилиб олди. Юрген Клоппнинг «Ливерпуль» жамоаси ички биринчиликда кучли тўртликдан ўрин эгаллаш учун кураш олиб борган бўлса-да, «Сити»ни «ўйиндан ташқари» ҳолатда қолдирди. Бу дуэлнинг тақдирини илк 30 дақиқалик ҳал этиб берган, десак адашмаган бўламиз. Салоҳ, Мане ва Чемберлен киритган голлардан сўнг, «Сити» ўзига кела олмади. Жавоб учрашувда Жезус тезкор гол урганига қарамай, якунда «қизиллар» ғалабани қўлга киритади.

2018/19- Гвардиоланинг «Манчестер Сити»си «Тоттенхэм» тўсиғидан ўта олмади (0:1; 4:3)

Орадан бир йил ўтиб, Пеп яна инглизча чорак финал қурбонига айланди. Бу сафар анчайин «ҳокисор» «Тоттенхэм» «Сити»ни чуқур "нокаут" ҳолатига тушириб қўйди. Лондондаги ягона голни Сон Хён Мин киритган бўлса, «Этихат»даги ўйин триллерга айланиб кетди. Ўйиннинг илк 20 дақиқасида 5 та гол киритилди. Кейин Агуэро жамоасини олдинга олиб чиқди. Захирадан ўйинга қўшилган Льоренте ҳисобни 4:3 кўринишига олиб келди. Рахим Стерлинг сўнгги дақиқаларда урган голи VAR сабабли бекор қилингач, Пеп яна бир бор плей-оффда таслим этилди.

ad4530595

2019/20 Гвардиоланинг «Манчестер Сити»си «Лион» тўсиғидан ўта олмади (1:3)

Турнир стартидан сўнг, кўплаб мутахассислар «Бавария» ва «Сити»ни ғолиблик учун асосий даъвогар эканлиги ҳақида фикр билдирди. Якунда «Бавария» финалга чиқди. «Шаҳарликлар» эса, ўз оёқлари орасидаги жамоаларнинг биридан «тарсаки» қабул қилиб олди.

Пеп ўз ўйин услубини 100 фоиз жамоага сингдирган бир пайтда, «Лион»га мағлуб бўлиш чинакам фожиа! Шу кунга қадар, Пеп 9 бор 9 хил клубдан енгилиб, ЕЧЛни тарк этган. Агар бу трюкни яна такрорласа, ўзига хос натижа қайд этган бўлади. Хўш, Пеп ва унинг жамоасини «юбилей» билан қайси клуб табриклайди? Бунисини вақт кўрсатади.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар