Гюлерни топ-клублар Англияга чақиряпти

Мадриднинг “Реал” клуби ярим ҳимоячиси Арда Гюлернинг Англия чемпионатига кўчиб ўтиши ҳақидаги хабарлар тобора кўпайиб бормоқда.

21 ёшли футболчига яна “Арсенал” томонидан жиддий қизиқиш билдирилаётгани айтилмоқда.

Журналист Себастьен Видаль маълумотига кўра, “канонирлар” ёш турк юлдузини жамоага олиб келиш учун амалий ҳаракатларни бошлаб юборган. Улар футболчи манфаатларини ҳимоя қилаётган агентлар билан алоқа ўрнатди.

“Ливерпуль” мутасаддилари ҳам Арда Гюлер атрофидаги вазиятни синчковлик билан  кузатиб бормоқда ва трансфер имкониятларини ўрганяпти.

Футболчининг ўзи эса ҳозирча “Реал”ни тарк этиш ҳақида ўйламаяпти. Агар у Мадриддан кетишга кўнса, харидор клуби 80 миллион евродан юқори сумма таклиф этишига тўғри келади.

Жорий мавсумда Арда Гюлер мадридликлар сафида барча мусобақаларда 50 та ўйинда иштирок этиб, 6 та гол урди ва 14 та голли узатма амалга оширди.