Ҳакими учун курашга ЕЧЛнинг амалдаги ғолиби ҳам қўшилди

Лондоннинг "Челси" клуби "Интер" ҳимоячиси Ашраф Ҳакими учун курашга қўшилди. Бу ҳақда FCInterNews нашри хабар тарқатмоқда.

Юқоридаги манбага кўра, “аристократлар” 22 ёшли марокашлик футболчини жорий ёзги трансферлар даврида сотиб олишни режалаштирмоқда. "Нерадзуррилар" эса клубда юзага келган молиявий қийинчиликлар сабаб Ашрафни сотиб юбориши мумкин. Бироқ Милан клуби шунда ҳам уни 70 миллион евродан камига қўйиб юбормоқчи эмас.

Айтиш лозимки, “Челси” Ҳакими учун курашда ПСЖ ва "Бавария" билан рақобатлашишига тўғри келади.

Ашраф Ҳакими ўтган мавсум "Интер" сафида жами 45 та ўйинда иштирок этди ва 7 та гол ҳамда 11 та голли узатмага муаллифлик қилди. Унинг клуб билан амалдаги шартномаси 2025 йилга қадар имзоланган.