Hamzat Chimaev qachon oktagonga qaytadi? Dana Uayt javob berdi

UFC rahbari Dana Uayt mashhur chechenistonlik jangchi Hamzat Chimaev oktagonga qachon qaytishi mumkinligini aytdi.

Uaytning so‘zlariga ko‘ra, uning qaytishi 26 oktyabr kuni Abu-Dabida (BAA) o‘tkazilishi rejalashtirilgan UFC 308 turnirida sodir bo‘lishi mumkin.

Eslatib o‘tamiz, Chimaev sog‘lig‘i bilan bog‘liq muammolar tufayli Avstraliya vakili Robert Uittaker bilan jangni bekor qilishga majbur bo‘lgandi. Ularning to‘qnashuvi kecha 22 iyun kuni UFC on ABC 6 turnirida bo‘lib o‘tishi rejalashtirilgandi.

UFC rahbariyati Chimaev o‘rniga ushbu jangga boshqa bir rossiyalik jangchi – Ikram Aliskerovni qo‘ydi. Jang esa Uittakerning birinchi raundda texnik nokaut evaziga g‘alaba qozonishi bilan yakunlandi.

Hamzat aralash yakkakurashlar bo‘yicha jami 13 ta jang o‘tkazib, ularning barchasida g‘alaba qozongan.