Ҳар бир ўйиннинг ўз қаҳрамонлари бор ёхуд "Сўғдиёна"нинг жавоҳири Суперлигада 3 та ўйиндан бери тенгсиз!

Суперлиганинг иккинчи даврасидаги шиддат ва муросасизлик борган сари жиддий тус оляпти. Ҳар бир ўйин жамоалар учун ўзига яраша машаққат билан ўтяпти ва асло осон учрашувларнинг ўзи қолмаган. Шунга яраша ҳар бир ўйиннинг ўз қаҳрамонлари бор.

“Насаф” – “Бухоро” – 1:0. Учрашувнинг энг яхши футболчиси – Алибек Давронов

Иккинчи давранинг дастлабки иккита учрашувида ғалаба қозона олмаган “Насаф” учун бу сафарги ўйин жуда муҳим эди. Чунки ғалаба қозонмаса бўлмасди. Чемпионлик учун курашаётган қаршиликлар иккита баҳсда 5 очко йўқотиб, асосий рақобатчиларини ўзидан олдинга ўтказиб юборди. Шунинг учун “Бухоро”га қарши беллашувда уч очко сув ва ҳаводек зарур эди. Аммо ғалаба осонликча қўлга киритилгани йўқ. Ҳадеганда гол уришни эплай олмаётган жамоага ҳимоячи Алибек Давронов катта саҳнага чиқди ва 74-дақиқада гол уриб “Насаф”га уч очкони тақдим этди. 21 ёшли футболчи ҳимояда ишончли ўйин кўрсатиши билан бирга ўзи ўйин тақдирини ҳам ҳал қилиб кетди. Давронов мисолида “Насаф”дан яна бир келажаги порлоқ футболчи етишиб чиқмоқда.

“Навбаҳор” – “Пахтакор” – 1:2. Учрашувнинг энг яхши футболчиси – Ҳожиакбар Алижонов

Чемпионлик йўлидаги курашда асосий фаворитлар иштирокидаги учрашув шубҳасиз марказий ўйин мақомига эга эди. Бунда “Пахтакор” мезбонлардан кучли эканлигини кўрсата олди. Айниқса, қанот ҳимоячиси Ҳожиакбар Алижонов ўйинни “ёндирди”. У рақиб футболчиларини шоширтириб қўйди ва унга ҳеч ким бас кела олмади. Иккинчи голни қандай яратилганини кўргандирсиз, бунинг асосчиси шубҳасиз Ҳожиакбар.

ОКМК – “Олимпик” – 2:1. Учрашувнинг энг яхши футболчиси – Хуршид Ғиёсов

Осиё Чемпионлар лигаси плей-офф ўйини олдидан ОКМК чемпионатда қийин ғалабани қўлга киритди. “Олимпик” билан учрашувда дастлабки голни пенальтидан урган Хуршид Ғиёсов якунда ўйиннинг энг яхши футболчисига айланди.

“Нефтчи” – “Сўғдиёна” – 0:0. Учрашувнинг энг яхши футболчиси – Жавоҳир Қаҳрамонов

Жасур Ҳасановнинг жароҳатидан кейин сардорлик боғичи остида майдонга тушаётган Жавоҳир Қаҳрамонов сўзсиз “Сўғдиёна”нинг асосий фигурасига айланди. У ҳозирча бир кўрсаткич бўйича ягона бўлиб турибди. Биласизми, иккинчи давра бошланиб, 3 та тур ортда қолган бўлса, барчасида Қаҳрамонов ўйиннинг энг яхши футболчиси сифатида эътироф этилмоқда. Ҳа, Жавоҳир “Сўғдиёна”нинг чинакамига жавоҳир ўйинчисига айланди.

“Сурхон” – “Турон” – 1:0. Учрашувнинг энг яхши футболчиси – Силванус Нимели

“Сурхон” иккинчи даврани ҳам ишончли тарзда ўтказяпти. Термизликлар ортда қолган учта турда 2 ғалаба ва 1 дуранг қайд этди. Охирги турда “Турон”ни қабул қилган ҳолда Силванус Нимелининг голи эвазига муҳим уч очкони қўлга киритди. Табиийки, учрашув қаҳрамонига айланган Нимели ҳақли тарзда энг яхши ўйинчига айланди.

“Бунёдкор” – “Андижон” – 2:1. Учрашувнинг энг яхши футболчиси – Игорь Иванович

“Қалдирғочлар” “Бургутлар”га қарши учрашувда иродали ғалабани қўлга киритганидан хабарингиз бор.  “Бунёдкор”нинг легионери Игорь Иванович жамоасининг ғалабасига катта ҳисса қўшди. У майдоннинг ҳар бир қарич ерида фаоллик кўрсатишга ҳаракат қилди ва голларда ҳам иштирок этди.

“Қизилқум” – “Металлург” – 0:2. Учрашувнинг энг яхши футболчиси – Забиҳилло Ўринбоев

Бекободликлар Навоийда “Қизилқум”га қарши баҳсда қимматли уч очкони қўлга киритишди. Ўтган турда “Навбаҳор”га қарши ўйинда охирги сонияларда гол уриб жамоасини мағлубиятдан қутқаран Забиҳилло Ўринбоев энг яхши футболчига айланганди ва бу сафар ҳам у яна энг яхшиси бўлди. “Металлург” иккинчи даврадаги дастлабки ғалабасини қўлга киритди ва Ўринбоев яна катта ҳажмдаги ишни бажарди.

Шуҳратбек Жўраев.