Ҳарри Кейн: Тезда яна 100 та гол ураман!

Бундеслиганинг 5-турида “Бавария” ўз уйида “Вердер”ни йирик 4:0 ҳисобида мағлуб этди. Ушбу беллашувда мюнхенликлар тўпурари Ҳарри Кейн дубли муаллифига айланди ва Европанинг “Топ-5” чемпионатларида бир клуб сафида энг тез 100 та гол урган футболчи сифатида тарихга кирди.

Англиялик ҳужумчи 104 та ўйинда 100 та гол киритиб, янги рекорд ўрнатди. Аввалги рекорд соҳиблари – Криштиану Роналду (“Реал Мадрид”) ва Эрлинг Холанд (“Манчестер Сити”) бу маррани забт этиш учун 105 та баҳсда майдонга тушган эди.

Ҳарри Кейн ўз рекордига эҳтирослар билан муносабат билдирди.

- Бу ўзим учун ҳам ақлбовар қилмас воқеа. Буюк клуб учун 100 та гол уриш – жуда катта шараф. Бу рекордда жамоадош дўстларим ва мураббийлар штаби вакилларининг ҳам хизмати катта. Улар менга ёрдам бериб келмоқда. Бу марра энг тез забт этганимдан хурсандман. Бундан буёғига янада қисқа муддатда яна 100 та гол уришга ҳаракат қиламан, - деди Ҳарри Кейн.

Ҳарри Кейн “Бавария”га 2023 йилнинг ёзида “Тоттенхэм”дан трансфер қилинган. Мюнхенликлар тўпурар учун қарийб 100 миллион евро харажат қилган. 32 ёшли футболчининг клуб билан амалдаги шартномаси 2027 йилнинг ёзигача давом этади.