Ҳеч ким танимайдиган футболчи Бекхэмнинг рекордини йўққа чиқарди

Европа Чемпионлар лигасининг умумий босқич тўртинчи турида Бельгиянинг “Брюгге” жамоаси ўз мухлислари кўз ўнгида “Барселона” билан 3:3 ҳисоида дуранг ўйнади.

Мезбонларнинг қанот ҳужумчиси Карлуш Форбш иккита гол ва битта ассист билан жамоасининг учала голида иштирок этди.

Шу тариқа, Форбш қитъанинг энг муҳим турнири тарихида “Барселона”га қарши ўтказилган учрашувлардаги Дэвид Бекхэмнинг рекордини янгилади.

Opta Sport статистика марказининг маълум қилишича, Дэвид Бекхэм Чемпионлар лигасида “Барселона”га қарши битта учрашувда ҳам гол урган, ҳам голли пас узатган энг ёш ўйинчи сифатида тарихга кирган.

Англиялик футболчи 1998 йили “Олт Траффорд”да ўтказилган баҳсда каталонияликлар дарвозасига гол уриб, ассист қайд этганида 23 ёшу 137 кунлик бўлган. Карлуш Форбш эса, бу самарали натижани 21 ёшу 231 кунлигида уддалади.

“Брюгге” клуби ва Португалия ёшлар терма жамоаси ҳужумкор футболчиси барча турнирларда 15 та ўйин ўтказиб, тўртта гол ва бешта ассист муаллифи бўлди.