Ҳиндистон терма жамоаси ўзбекистонликлар билан 2 та ўртоқлик ўйини ўтказиш учун юртимизда келади

Футбол бўйича Ўзбекистон аёллар миллий терма жамоаси 6-13 сентябрь кунлари қўшни Қирғизистоннинг Қоракўл шаҳрида ўтказиладиган “Умид кубоги-2019” халқаро мусобақасида иштирок этиши ҳақида хабар берган эдик.

Мазкур мусобақа олдидан футболчи қизларимиз Тошкентда ўқув-машғулот йиғини олиб боришади. Пойтахтимиздаги йиғин 27 август – 5 сентябрь оралиғида ташкил этилади. Бундан ташқари ушбу йиғин доирасида 2 та ўртоқлик ўйини ҳам ўтказилади. Бу ҳақда ЎФА матбуот хизмати хабар берди.

Манбанинг маълум қилишича, терма жамоамизга Ҳиндистон аёллар миллий терма жамоаси рақиблик қилади. Дастлабки учрашув 29 август куни бўлиб ўтади. Иккинчи ўйин эса 2 сентябрь куни ўтказилади.

Ҳар икки учрашув ҳам “Яккасарой” стадионида соат 17:00да старт олади.