Husanov Muhammad Saloh bilan yangi duelga tayyormi?

2026 yilgi jahon chempionatiga tayyorgarlik ko‘rayotgan O‘zbekiston milliy terma jamoasi noyabr oyidagi ikki haftalik xalqaro tanaffus davrida Birlashgan Arab Amirliklarida tashkil etiladigan Xalqaro Al-Ayn kubogi musobaqasida ishtirok etadi.

14-17 noyabr kunlari bo‘lib o‘tadigan ushbu turnirda Fabio Kannavaro shogirdlari bilan bir qatorda jahon chempionatiga yo‘llanma olgan Misr, Eron va Kabo-Verde milliy terma jamoalari ham maydonga tushadi.

O‘zbekiston milliy terma jamoasi turnirni Misr futbolchilariga qarshi uchrashuv bilan boshlaydi.  Sports.uz portali nufuzli manbalardan biri –  soccer365 saytida e’lon qilingan  ushbu bahsga tegishli qiziqarli ma’lumotlarni o‘zbekistonlik futbol ishqibozlari e’tiboriga havola etadi.

O‘zbekiston 2025 yilda faqat bir marta yutqazgan

Jamoani mamlakat tarixidagi birinchi jahon chempionatiga Timur Kapadze olib chiqqan edi. Bir oy avval almashuv bo‘ldi. Bosh murabbiylikka Fabio Kannaro tayinlandi, Kapadze uning assistentiga aylandi.

Oktyabr oyida O‘zbekiston ikkita o‘rtoqlik uchrashuv o‘tkazib, Kuvaytni 2:0 hisobida engdi va Urugvayga 1:2 hisobida yutqazdi.  O‘zgarishlar davom etmoqda. Timur Kapadze Fabio Kannavaroning yangi muhitga moslashishiga yordam berganidan keyin terma jamoani tark etdi. Timur mustaqil tarzda ishlamoqchi.

Fabio o‘ziga yangi yordamchi sifatida “Bunyodkor”dagi ishi orqali mahalliy futbolchilarni yaxshi biladigan italiyalik mutaxassis Karlo Alberto Bertoneni oldi.

Husanov tiklanib oldi, Shomurodov “yondiryapti”

Terma jamoa tarkibida jiddiy o‘zgarishlar bo‘lgani yo‘q, Kannavaro ishlab turgan tizimni saqlab qolishni ma’qul ko‘rdi. Eng katta yangilik – oxirgi oylarda jarohat bilan kurashgan va “Manchester Siti” tarkibida Angliya ligasi kubogida “Suonsi”ga qarshi bahsda to‘p tepgan Abduqodir Husanovning safga qaytishi bo‘ldi.  Ayni paytda bu himoyachi terma jamoada mashg‘ulotlarni boshlab yuborgan.

Rossiya Premer-ligasidan ketganidan buyon faoliyatidagi eng yorqin mavsumni o‘tkazayotgan Eldor Shomurodov ham terma jamoa tarkibida shug‘ullanyapti.

30 yoshli hujumchi “Istanbul Bashakshir”ga o‘tganidan beri jami 18 ta uchrashuvda raqiblar darvozasini 8 marotaba ishg‘ol qildi. Oxirgi beshta bahsdan to‘rttasida o‘z hisobiga gollar yozdirib qo‘ydi. Bir oy oldin Kuvayt darvozasiga g‘alaba to‘pini aynan Shomurodov kiritgan edi.

O‘zbekiston top-uchrashuvlarda zo‘r o‘ynayapti

Kannavarogacha O‘zbekiston muhim uchrashuvlarda zo‘r o‘ynab kelayotgan edi. 2024 yilgi Osiyo kubogida Avstraliya bilan durang (1:1) o‘ynadi, chorak finalda mezbon Qatarga faqat penaltilar seriyasida imkoniyatni boy berdi.

Jahon chempionati saralashida asosiy favorit Eronga yutqazmadi (0:0 va 2:2), ikkinchi davrda Qatarni 3:0 hisobida engdi.

CAFA Nations Cup 2025 xalqaro turniri finalida o‘zbeklar Eron terma jamoasi ustidan 1:0 hisobida g‘alaba qozondi. Kalendar yildagi yagona mag‘lubiyat Kannavaro qo‘l ostida Urugvayga qarshi murosasiz kurashlar ostida o‘tgan uchrashuvda kuzatildi – 1:2.

Misr jahon chempionati saralashida nimalarga qodirligini ko‘rsatdi

Misr 2026 yilgi jahon chempionati saralash turnirini deyarli ideal tarzda o‘tkazdi. O‘nta turda ular sakkizta g‘alaba va ikkita durang qayd etdi. 2025 yilgi oltita uchrashuvda  beshta g‘alaba va bitta durang natija ko‘rsatgan misrliklar bu o‘yinlarda darvoza daxlsizli gini saqlab qoldi.

Shuningdek, misrliklar mundial saralashining eng zo‘r jamoasi bo‘lgan Tunisga qarshi ikkita o‘rtoqlik bahsida g‘olib (1:0, 3:0) chiqdi.

Misr terma jamoasi jahon chempionati saralashining oxirgi o‘yinini 12 oktyabr kuni o‘tkazdi. Endi ular mundialga tayyorgarlikni Birlashgan Arab Amirliklarida tashkil etilayotgan xalqaro turnir doirasida O‘zbekiston milliy terma jamoasiga qarshi bahs bilan boshlaydi.

Bosh murabbiyning tanlovi e’tirozlarga sabab bo‘ldi

Misr terma jamoasi bosh murabbiyi Xusam Husan katta syurprizlarga qo‘l urgani yo‘q. Biroq 9 noyabr kuni Misr Superkubogi uchun bahsda o‘zaro to‘qnash kelgan “Al-Ahli” va “Zamalek” futbolchilari bu gal terma jamoaga chaqirtirilmadi.

Yassir Ibrohim, Ahmad Kuka, Yassin Marey, Muhammad Avad  va Umar Jobir terma jamoa qaydnomasiga kiritilmaganidan norozi bo‘ldi, biroq bu qaror klublar rahbariyatiga ma’qul keldi. Nasser Mohir esa ijtimoiy tarmoqlardagi sahifasida o‘z e’tirozlarini e’lon qilishdan hayiqmadi.

Eng asosiysi, “Liverpul”da murakkab davrlarini boshdan o‘tkazayotgan Muhammad Saloh terma jamoa ixtiyoriga etib keldi. Uning hozir kayfiyati zo‘r, “Liverpul”ning oxirgi uchta o‘yinida uchta to‘p kiritdi.

Misr himoyadagi muammolarni bartaraf qildi

Misr “Afrika millatlari kubogi-2024”da bo‘sh ishtirok etdi va  turnirni 1/8 final bosqichidayoq tark etdi. Muvaffaqiyatsizliklarning asosiy sababi himoyaning zaifligi bo‘ldi. Misrliklar to‘rtta uchrashuvning birortasida darvoza daxlsizligini saqlay olmadi va jami ettita to‘p o‘tkazib yubordi.

Xusam Hasan shundan so‘ng, xatolar ustida ishladi va Misr terma jamoasi jahon chempionatining saralashini namunaviy darajada o‘tkazdi: o‘nta turdan sakkiztasida raqiblarga gol urish imkoni berilmadi va bor-yo‘g‘i o‘z darvozasidan ikkita to‘p olib chiqdi xolos.

Yuqoridagilarni inobatga olib, O‘zbekiston va Misr o‘rtasidagi uchrashuvda 1:1 hisobidagi durang natija taxmin qilinmoqda.

Husanovga kim ustozlik qiladi?

O‘zbekistonning shov-shuvli g‘alabasiga qanday munosabat bo‘ldi?

O‘zbekiston Xorvatiyadan o‘toladimi? Imkoniyatlarga baho berildi