Шомуродовни безовта қилманг! Элдор бўйича “Рома”га босим бўляпти...

“Рома” мухлислари Европа лигаси умумий босқичидаги сўнгги ва ҳал қилувчи учрашувда “Айнтрахт” дарвозасини ишғол қилиб, римликларни кейинги босқичига йўлланма олишига ҳисса қўшган Элдор Шомуродовни қўллаб-қувватламоқда.

Пойтахтнинг талабчан мухлислари “Рома”нинг ижтимоий тармоқлардаги расмий саҳифалари орқали Клаудио Раньери бошчилигидаги мураббийлар штабидан ўзбек футболчисига кўпроқ имконият беришини,  клуб мутасаддиларидан эса, меҳнаткаш футболчини жамоада олиб қолишни сўраяпти.

Sports.uz портали ўзбекистонлик футбол ишқибозларини легионеримиз атрофида бўлаётган фикр-мулоҳазалар билан таништиришда давом этади.

Riccardo Vitale:

Энг аввало, Элдорни жамоага ва ишга бўлган муносабатини қадрлаш керак. Шомуродов клуб ундан қутилмоқчи бўлиб турган паллада ҳам борини бериб ўйнаяпти. Артём Довбик шундай қилиш кераклигини тушуниб етгани йўқ.

Pietro Garofoli:

Шомуродовга балли, у ўзининг ҳаракатчанлиги билан асосий таркибда ўйнашга лойиқ эканини исботлади.

Cesare Corbelli:

“Рома”га олдинги чизиқда тезкорлик етишмаяпти. Шомуродов айнан мана шу хусусиятни таъминлаб бериши мумкин. Агар уни Довбик билан бирга ўйнатса, Артёмга кўп қулай вазиятлар яратиб беради.

Rossano Zannotti:

Ўз ўйинчиларини қадрига етмаслик фақат “Рома”га хос хусусият бўлса керак. Акс ҳолда Шомуродовни яна ижарага жўнатишга ҳаракат қилмасди.

Аслида Элдор жуда яхши ўйинчи, қисқа вақт берилаётганига қарамай, ҳар бир тўп учун курашади, ҳар доим садоқат ва сифатини намойиш қиляпти. Бунақа ўйинчини қўйиб юборишдан аввал, яхшилаб ўйлаб кўриш керак.

Lazzaro Scacerni:

Агар Довбикда Шомуродовнинг ҳаракатини ярми бўлганида ҳам 40 та гол урган бўларди.

Giulio Gennarini:

Довбик, сен Шомуродовнинг қандай ўйнаётганини, ҳаракатларининг аниқлигини, дарвозани топа олишини кўрдингми? Эссиз, увол кетган миллионлар...

Patrizia Duchini:

Шомуродовни олиб қолиб, Довбикни сотиб юборайлик...

Giuseppe Santopietro:

Менга Шомуродов ҳар доим ёққан. Техникаси кучли ва қўлидан кўп нарса келади. Майлонга тушганида рақиб дарвозаси олдида хавф юзага келади. Аслида у бизда ўйнаб кетган Андреа Белоттидан ҳам зўр.

Mario Negri:

Артём Довбик ишончни оқламади, Шомуродовга гап йўқ.

Andrea Drago:

Бугунги кунда Шомуродовнинг қадрига етмаяпмиз. Ўйинда унга кўпроқ вақт бериш кифоя. Кўпчилик мухлислар Элдор  ўзини кўрсата олишига ишоняпти.

Dani Caste:

Элдор – бизнинг қутқарувчимиз!

Vincenzo D'elia:

Шомуродовни безовта қилманг, жойида қолсин!

Alessandro Flavioni

Бу шахсий фикрим: Агар Шомуродовни асосий таркибда ўйнатганимизда жамоа тўплаган очколарга яна ўнлаб очколар қўшилган бўларди...

Paola Carta:0

Довбик ўйнаса, тўпни тўхтата олмайди, тўп сакрамайди, олдинга силжимайди, бу қанақа ҳужумчи ўзи?

Украиналик футболчига Элдор Шомуродов ҳақиқий ҳужумчи қандай бўлишини бир ярим дақиқа ичида кўрсатиб қўйди.

Felipe Ojos Pintados:

Шомуродовни мунтазам ўйнатиш керак. Элдорни жамоада олиб қолиб, яхшиси ҳимоячи, ярим ҳимоячи олайлик. Ана жуда керак бўлса, учинчи ҳужумчи сифатида Бетони олиб келинг.

Pasquale Losacco:

Шомуродовни бошқа клубга бериб юборишдан олдин, яхшилаб ўйлаб кўриш шарт. Довбикка дам беринг. Шомуродовни асосий таркибда ўйнатиш лозим.

Giovanni Maddalena:

Мухлислар фикри бўйича Артём Довбикдан анча кучли бўлган Элдор Шомуродовни кетказиш керак эмас, аксинча, украиналик ўйинчини захирага михлайдиган бошқа ҳужумчи олиб келиш керак.

Federica Cichi:

Ҳамма Шомуродовнинг кўпроқ ўйнашга лойиқ эканини ҳис қиляптими ёки фақат менга шундай туюляптими?

Элдор Шомуродов жорий мавсумда учта турнирда жами 17 та учрашувда иштирок этиб, умумий ҳисобда 378 дақиқа ўйнади. Шунга қарамай, 29 ёшли ҳужумчи рақиблар дарвозасига учта гол урди ва битта ассист қайд этди.