Ҳусанов ўйнаган учрашув тарихий бўлиб чиқди

“Манчестер Сити” Англия кубоги доирасида янги рекорд ўрнатди. Хосеп Гвардиола шогирдлари нуфузли мусобақанинг чорак финалида “Борнмут” меҳмони бўлди.

Рақиб майдонида ўтказилган учрашувда “шаҳарликлар” Эрлинг Холанд ва Умар Мармушнинг биттадан голи эвазига иродали ғалабага эришди.

Абдуқодир Ҳусанов бу беллашувни бошланғич таркибда бошлаб, танаффусда ўрнини жамоадоши Нико О’Рейлига бўшатиб берди.

Нико иккинчи бўлимда жамоасининг ҳар икки голига ассистентлик қилди. Учрашувда 2:1 ҳисобида зафар қучган “Манчестер Сити” қаторисига еттинчи маротаба мусобақа ярим финалига йўлланма олди.

Squawka статистика марказининг хабар беришича, мусобақанинг 154 йиллик тарихида хали бирор жамоа кетма-кет етти марта ярим финалга чиқмаган экан.

Хосеп Гвардиола шогирдлари 26-27 апрелга белгиланган ярим финалда “Ноттингем Форест” билан куч синашади. Иккинчи ярим финалда “Астон Вилла” ва “Кристал Пэлас” ўзаро тўқнашиб, финалга қайси жамоа чиқишини ҳал этади.