Ҳусановнинг жойи ўзгаради

“Манчестер Сити” ўтган мавсум кузатилган инқироздан кейин таркибни янгилаш, ёшартириш ва авлодлар алмашинуви жараёнида қатор позицияларга янги ижрочиларни олиб келди.

Охирги иккита трансфер бозорида Хосеп Гвардиола ўз жамоасига Абдуқодир Ҳусанов, Витор Рейс, Умар Мармуш, Нико Гонсалес, Жума Ба, Тижани Рейндерс, Райан Айт-Нури, Райан Шерки, Сверре Нюпан сингари ўйинчиларни қўшиб олди.

Хўш, “Манчестер Сити” таркиби тўлиқ шаклландими? Позицияларда яна қандай муаммолар бор?

Бу каби саволларга esteemedkompany.com портали эксперти Адам Марретт жавоб қидирди. Sports.uz портали эса, ушбу мутахассис фикр-мулоҳазаларини ўзбекистонлик футбол ишқибозларига ҳавола этади.

- Янги мавсум олдидан “Манчестер Сити”нинг ягона нозик нуқтаси – ўнг қанот ҳимояси бўлиб турибди. Хосеп Гвардиола жамоасига назар солиб, ўнг қанот ҳимоячиси ролини бажариш учун Матуес Нуньес ва Рико Льюис ўзаро рақобат олиб боришини кўриш мумкин. Шунга қарамай, “Манчестер Сити” таркибни тўлиқ шакллантириши учун бу нуқтага яна бир сифатли ўйинчи сув ва ҳаводек зарур.   

“Манчестер Сити”да ҳозирнинг ўзида бу позицияда муваффақиятли ўйнай оладиган номзод бор. Абдуқодир Ҳусанов марказий ҳимоячи бўлишига қарамай, ўнг қанот ҳимоячиси жойида ўйнаш учун ўзида барча керакли сифатларни жамлаган ўйинчи ҳисобланади ва ўз хизматларини таклиф қилишга тайёр.

Балки Гвардиола янги мавсумда айнан ўзбек футболчисини бу позицияда синаб кўриши энг тўғри қарор бўлар.

Нуньес ва Льюис жамоага нима бера олишини ҳамм яхши билади. Нуньес ўз тезлиги ва ўнг қанотдан олдинга ўтиши билан жамоа ҳужумларига қўшимча куч бағишлайди. Кейинги пайтда рақиб жарима майдончаси томон қулай пас оширишни ҳам ўрганиб олди. Лекин Нуньес ҳарчанд уринмасин, ҳимояланишда барибир бехато ўйнай олмаяпти.

Рико Льюис эса, техникаси юқорилигидан фойдаланиб, тўпни назорат қилишга уста. Аммо у кўпинча, ўнг қанотдан марказга ўтиб кетади. Шу боис, аксарият ҳолларда тўп йўқотилган вазиятда уни ўнг қанот ҳимоясида бўшлиқ пайдо бўлади. Бу эса, ҳимоя яхлитлигининг бузилишига олиб келяпти.

Абдуқодир Ҳусанов эса, бу икки ўйинчи фонида ўнг қанотда ишончли ҳимоя қўрғони бўлиши мумкин. Ўзбек легионерининг тезлиги катта, ўйинни яхши ўқий олади, яккакурашларда жуда кучли. Бу хусусиятларнинг барчаси ўнг қанот ҳимоячисидан талаб қилинадиган сифатлардир.

Бироқ Абдуқодир эҳтиёткор ўйин кўрсатишга кўниккан, ҳужумга ўтиб кетавермайди. Агар “Сити” уни қанотда ўйнатса, Нуньес тақдим этадиган ҳужум кескинлиги бироз пасайиши эҳтимоли бор. Қолаверса, Абдуқодир майдон марказида Льюисдек самарали ҳаракат қила олмаслиги мумкин. Чунки бу унинг жойи эмас.

Аммо, энг асосийси, “Манчестер Сити”нинг ҳужум уюштирадиган ёки марказда тўпни ушлаб турадиган эмас, биринчи навбатда, ўнг қанотни  ҳимоя қиладиган ўйинчига эҳтиёжи бор. Ҳусанов эса, бу мақсадга тўлиқ мос тушади.

Аслида “Манчестер Сити” бу позицияга “Ньюкасл”дан Тино Ливраментони олиб келмоқчи эди. Manchester Evening News нашри журналисти Тайрон Маршаллга кўра, “Сити” бу трансфердан воз кечди. Энди Хосеп Гвардиола бўшлиқни ички имкониятлар билан тўлдиради.

Гарчи ўнг қанотда ўйнашга Нуньес ва Льюис асосий даъвогар бўлса-да, Абдуқодир Ҳусанов исталган пайтда уларнинг ўрнини боса олади. Бу вазифасини уддалаш учун ўзбек футболчисининг жисмоний ва техник имкониятлари, маҳорати ва салоҳияти етарли. Шундай экан, янги мавсумда Абдуқодир Ҳусанов айнан мана шу позицияда кўпроқ ўйин амалиётига эга бўлиши ва жамоага ёрдам бериши эҳтимоли катта, - деб ёзди esteemedkompany.com портали эксперти Адам Марретт.

Ҳусановга жой борми? Гвардиола янги таркиб шакллантиряпти

“Реал” Ҳусановнинг жамоадоши учун икки юлдузини беради

Ҳусановнинг дўстини “Реал” олади!

Файзуллаев ЦСКАга “янги Месси”ни кашф қилиб кетди

Файзуллаев бу футболчилар орасида суперюлдузга айланади