Ибрагимович Шомуродовнинг жамоасига қарши ўйнамайди. Чунки...

"Милан" ҳужумчиси Златан Ибрагимович А Сериянинг 30-туридан ўрин олган "Парма"га (2:0) қарши ўйиндаги ҳаракатлари учун жазоланди. Бу ҳақда Football-italia хабар бермоқда.

Италия футбол федерацияси тартиб-интизом қўмитаси 39 ёшли швециялик футболчини учрашув расмийларига нисбатан ҳурматсизлик қилгани учун 5 минг евро жаримага тортди ҳамда 1 та ўйинга дисквалификация қилди. Энди у 18 апрель куни "Женоа"га қарши ўйинни ўтказиб юборади.

Эслатиб ўтамиз, футболчи ҳакам Фабио Марескки билан зиддиятдан сўнг тўғридан-тўғри қизил карточка олган эди.

Ибрагимович жорий мавсум А Серияда 17 та ўйинда майдонга тушди. У ушбу ўйинларда жами 15 та гол ҳамда 2 та голли узатмага муаллифлик қилди.