Икки футболчи умрбод футболдан ҳайдалди

МЛС раҳбарияти икки футболчи — америкалик ярим ҳимоячи Деррик Жонс ва ганалик легионер Яв Йебоани умрбод дисквалификация қилиш қарорини чиқарди.

Лига матбуот хизмати маълумотига кўра, тергов жараёнида футболчилар лига ўйинларига, жумладан, ўз жамоалари иштирок этган учрашувларга фаол равишда пул тиккани аниқланган.

Қонунбузарликлар 2024 ва 2025 йилги мавсумларда қайд этилган.

Санкцияларга сабаб бўлган ҳолатлардан бири 2024 йил 19 октябрдаги учрашув билан боғлиқ. Бу ўйинда ҳар икки футболчи Жонс сариқ карточка олишига пул қўйган. Натижада учрашувда айнан шу ҳолат амалга ошган.

Ўша вақтда ҳар икки футболчи “Коламбус Крю” клуби сафида ўйнар эди.

Ҳозирда 29 ёшли Деррик Жонс эркин агент ҳисобланади. У аввал “Филадельфия Юнион”, “Нэшвилл”, “Хьюстон” ва “Шарлотт” клубларида тўп сурган.

28 ёшли Йебоа эса Хитойнинг “Циндао Хайню” клубида ўйнамоқда. МЛСда у “Коламбус Крю”дан ташқари “Лос-Анжелес” жамоаси шарафини ҳам ҳҳимоя қилган. Яв Йебоа 2023 йилда МЛС чемпиони бўлган. У финалда “Лос-Анжелес”га қарши ўйинда “Коламбус Крю” учун ҳал қилувчи голни урган эди.