Икки клуб "Манчестер Юнайтед" ҳужумчиси Зиркзее учун курашмоқда

«Манчестер Юнайтед» форварди Жошуа Зиркзее Италия А Сериясининг икки етакчи клуби диққат марказида турибди.

Football-Italia нашри хабарига кўра, 25 ёшли нидерландиялик ҳужумчи учун асосий даъвогарлар сифатида «Ювентус» ва «Наполи» кўрсатилмоқда. Маълумотларга қараганда, Зиркзее Турин клубига ўтишга розилик берган, бироқ «Ювентус» собиқ «Болонья» юлдузини расман имзолашдан олдин ўз таркибидаги ҳужумчилардан бири билан хайрлашиши керак бўлади.

Шу билан бирга, Лучано Спаллетти томонидан тактик саволлар ҳам борлиги айтилмоқда. «Бьянконери» устози жамоада анъанавий марказий ҳужумчи – «тоза тўққизинчи рақам» кўришни истайди. Зиркзее эса кўпинча орқага чекиниб, ярим ҳимоя чизиғида тўпни ўйинга киритишда фаол иштирок этишга мойил.

«Наполи» ҳам «қизил шайтонлар» футболчисига бўлган қизиқишини сақлаб қолмоқда, аммо неаполликлар ҳозирча асосий эътиборни «Арсенал» ҳужумчиси Габриэл Жезусга қаратган. Бундан ташқари, «Наполи» ҳам янги ҳужумчига йўл очиш учун аввало таркибдан бир футболчини қўйиб юборишига тўғри келади. Эҳтимол, жамоани тарк этадиган ўйинчи Ноа Ланг бўлиши мумкин.

«Манчестер Юнайтед» раҳбарияти Зиркзеени сотиб олиш мажбурий шартисиз ижарага беришга тайёр экани айтилмоқда. Бу эса нидерландиялик форварднинг яна Италия чемпионатига қайтиб бориш эҳтимолини сезиларли оширади.