Икки марта дарвозабон алмаштирилган ва қизил карточка кўрсатилган ўйинда ПСЖ рақибини янчиб ташлади!

23 январь, 2021, 03:01
0
Футбол

Франция 1-Лигаси 21-туридан ўрин олган ПСЖ - "Монпелье" учрашуви ўз ниҳоясига етди. Унда парижликлар ўз рақибини 4:0 ҳисобида мағлубиятга учратди. Голларга Мбаппе (34, 63), Неймар (60) ҳамда Икарди (61) муаллифлик қилди.

Ўйиннинг 18-дақиқасида "Монпелье" дарвозабони катта тезликда жарима майдони ичига ёриб кираётган Мбаппени қўполлик билан йиқитди ва ВАРга мурожаатдан сўнг, қизил карточкага лойиқ кўрилди. 1 киши кам бўлиб қолган "Монпелье" эса, ярим ҳимоячи ўрнига захира дарвозабонини туширганига қарамай, гол ўтказиб юборди. 2-таймда эса ПСЖ бўлимни дарвозабонни алмаштириб бошлади. Сабаби номаълум.

60-дақиқага келиб, ПСЖ кучли штурм уюштириб меҳмонлар руҳиятини тушириб юборди ва 3 дақиқа ичида 3 та гол уриб, ҳисобни даҳшатли кўринишга келтириб қўйди. 4:0! Ушбу ғалабадан сўнг, ПСЖ ўз очколари сонини 45 тага етказиб олган ҳолда 2-ўриндаги "Лилль"дан 3 очко ўзиб кетди. "Монпелье" эса 28 очко билан 11-ўринни эгаллаб турибди.

90+2'
Учрашув якунланди! ПСЖ ўз уйида рақибини янчиб ташлади. Матнли трансляцияни Абдулла Маннонов олиб борди. Эътиборингиз учун раҳмат!
90+1'
ПСЖ бурчак тўпидан сўнг хавфли вазият юзага келтира олмади.
90+'
Ўйин асосий вақтига 1 дақиқа вақт қўшиб берилди.
88'
Килиан Мбаппенинг ажойиб зарбасини Дмитрий Берто қайтарди! Ажойиб сейв.
85'
Алессандро Флоренцининг чап бурчакка берган зарбасига бирозгина аниқлик етишмади!
84'
ПСЖ бурчакдан тўпни ўйинга киритиб берди, бироқ ҳимоячилар тўпни узоқлаштирди.
82'
ПСЖда ўзгариш: Мауро Икарди ўрнига Пабло Сарабия майдонга тушди.
80'
Верратти сариқ карточка олди!
79'
Ди Мария жарима тўпидан зарба берди, жонли деворга тегиб қайтган тўпни Неймар дарвозага тўғирлади, бироқ унга аниқлик етишмади.
77'
Неймар қизишиб кетганлиги боис сариқ карточка билан жазоланди.
76'
ПСЖда ўзгариш: Паредес ўрнига Данилу, Кюрзава ўрнига Митчелл Баккер ўйинга қўшилди.
74'
Ди Мариянинг жаримадан узатган тўпини Керер боши билан дарвозага тўғирлади, бироқ тўп юқорилаб кетди.
73'
ПСЖ бурчак тўпидан тезкорлик билан фойдаланди.
71'
"Монпелье"да яна ўзгариш: Эл Вахи ўрнига Лаборде ўйинга қўшилди.
70'
"Монпелье"да ўзгариш: Конгре ўрнига Козза ўйинга қўшилди.
69'
Ух! Кюрзаванинг чалқанчасига берган зарбаси дарвоза тўсинига тегди! Даҳшат!
68'
"Монпелье"да ўзгариш: Мавидиди ўрнига Де Теллек майдонга қўшилди.
67'
ПСЖ футболчисида офсайд қайд этилди.
63'
ГООООООООООООООООООЛЛЛ!!! Тезкор қарши ҳужумдан сўнг Икарди тўпни Мбаппега узатди, деярли бўш қолган дарвоза эса ишғол қилинди! Мбаппедан дубл. 4-0!
61'
ГООООООООООООООООЛЛЛ!!! Икарди тезкорлик билан ҳисобни ишончли кўринишга келтириб қўйди! Флоренцининг узатмаси рикошетдан сўнг Икардига бориб тушди, тўп эса дарвозада! 3-0!
59'
ГООООООООООООООООООЛЛЛ!!! Мбаппенинг жарима майдони ичида Неймарга тўпни етказиб берди, Неймар эса тўпни дарвозага жойлаб қўйди! 2-0!
58'
Парижликлар рақиб майдонида позицион ҳужум ташкил этишмоқда.
57'
ПСЖ бурчакдан тўпни ўйинга киритиб берди, ҳимоячилардан бири тўпни узоқлаштирди.
55'
Икарди жарима майдони ичида тўпни қабул қилиб олди ва зарба берди! Дарвозабон жамоасини голдан сақлаб қолди!
52'
Почеттино ўзгариш амалга оширади: Маркиньос ўрнига Тило Керер ўйинга қўшилди.
50'
ПСЖ тўпни назорат қилмоқда.
47'
Деярли голли вазият! Алессандро Флоренци жарима майдони ичига тўпни етказиб берди, бироқ дарвозабон тўпга биринчи бўлиб чиқиб келди!
46'
ПСЖ таймни дарвозабон ўзгариши билан бошлади: Кейлор Навас ўрнига Серхио Рико ўйинга қўшилди.
46'
2-бўлим бошланди!
45'
Футболчилар майдонга қайтишмоқда. Биз ҳам қайтамиз.
45+5'
1-бўлим якунланди!
45+4'
Саванье тўп учун курашда ПСЖ аъзоларидан устун чиқди. Қарши ҳужум.
45+3'
ПСЖ тўпни назорат қилган ҳолда позицион ҳужум намойиш этмоқда.
45+2'
Неймарнинг дарвозага берган зарбасини дарвозабон осонлик билан ушлаб олди.
45+1'
"Монпелье" футболчиси Педро Мендеш Неймарга нисбатан ўйин қоидасини бузгани учун сариқ карточка билан жазоланди.
45'
Биринчи таймга 5 дақиқа вақт қўшиб берилди.
44'
Неймар ҳужумда фол намойиш этди.
43'
"Монпелье" аъзоси Гаэтан Лаборденинг дарвозага берган зарбаси Навас қўриқлаётган постнинг устидан ўтиб кетди!
42'
"Монпелье" бурчакдан тўпни ўйинга киритиб берди.
41'
"Монпелье" футболчиси Самбья жарима майдони ичига тўпни етказиб берди, бироқ ҳимоячилар тўпни майдон ташқарисига чиқариб юборди.
40'
Дарвозага бўлган зарбалар статистикаси: 10-0!
39'
ПСЖ бурчак тўпидан тезкорлик билан тўпни ўйинга киритиб берди.
38'
Неймар дарвозага зарба позициясидан туриб ажойиб тарзда зарба берди, дарвозабон уни қайтарди!
37'
ПСЖ ажойиб тарзда прессингли ҳужум уюштирмоқда!
36'
Ҳимоячиларнинг омади келди! Флоренцининг узатмаси Мбаппегача етиб бормади. Ажойиб ҳимоя!
35'
ПСЖ тўпни назорат қилмоқда.
33'
ГООООООООООООООООЛЛЛ!!! Жарима майдони ичига ажойиб тарзда ёриб кирган Мбаппе тўпни дарвозабоннинг устидан ошириб дарвозага жойлаб қўйди! 1-0!
32'
"Монпелье"да ўзгариш: жароҳат олган Молле ўрнига Шотар ўйинга қўшилди.
31'
Уххх! Ўнг қанотдан Флоренци узатган тўпни Икарди яна дарвозага жойлай олмади! У тўпга сал тегиб юборса бўлди эди!
30'
"Монпелье" аъзоси билан Неймар тўқнашиб кетди. Бунинг оқибатида Флориан Молле жароҳат олди. У тиббий ёрдам олмоқда.
29'
ПСЖ тўпни ажойиб тарзда олиб қўя олмоқда.
28'
Кюрзаванинг жарима майдони ичида Ди Марияга узатган тўпни аргентиналик футболчи дарвозага тўғирлади! Яна бироз аниқлик етишмади...
27'
Неймар рақиб футболчисига нисбатан ўйин қоидасини бузди.
25'
Неймарнинг жарима майдони ичига узатган заргарона узатмасини Икарди дарвозага тўғирлади! Бироз аниқлик бўлганида бу гол эди!
23'
ПСЖ бурчакдан тўпни ўйинга киритиб беради. Ди Мария берган зарбага аниқлик етишмади!
21'
Неймар жарима зарбасини ижро этди, бироқ унга бироз аниқлик етишмади!
20'
Ўзгариш: Михайло Ристич ўрнига захирадан дарвозабон Дмитрий Берто ўйинга қўшилди. "Монпелье" ўйинни бир киши кам бўлим давом эттиради.
19'
Қизил!!! Бош ҳакам видеотакрорларга мурожаатдан сўнг дарвозабонга қизил карточка кўрсатди! Ана бўлмасам!
18'
ВАРга мурожаат! Бош ҳакам қизил карточка кўрсатиши мумкин!
17'
Қаттиқ йиқилган Мбаппе тиббий ёрдам олмоқда.
16'
"Монпелье" дарвозабонига сариқ карточка кўрсатилди: катта тезлик билан жарима майдони ичига кириб кетаётган Мбаппе чизиқ устида йиқитилди! Пенальти йўқ.
14'
Неймар жарима зарбасидан тўпни ичкарига етказиб берди, бироқ Маркиньос ҳимоячига тўп учун курашда енгилди.
14'
Верраттига нисбатан ўйин қоидаси бузилди. Неймар жарима тўпи тепади.
13'
Мбаппе ўнг қанотда 4 футболчи орасида қолиб кетди.
12'
Неймар бурчакдан тўпни жарима майдони ичига етказиб берди, Кимпембенинг зарбаси эса дарвоза устидан ўтиб кетди.
11'
Флоренци тўпни жарима майдони ичига етказиб берди, ажойиб кросс. Ҳимоячи уни бурчакка чиқариб юборди.
9'
Ўнг қанотда тўпни қийинчилик билан қабул қилиб олган Паредес тўпни дарвоза ёнидаги шерикларига етказиб берди, бироқ Неймар, Икарди ва Мбаппе бўш дарвозани ишғол қила олишмади!
7'
"Монпелье" дарвозабони Ди Марияни ажойиб финти билан чалғитди, Ди Мария йиқилиб тушди.
6'
Неймарга нисбатан ўйин қоидаси бузилди.
5'
Икарди жарима майдони яқинида тўпни қабул қилиб олди ва Ди Марияга узатди, ноқулай позицияда бўлганига қарамай аргентиналик футболчи дарвозага зарба берди. Дарвозабон қийинчилик билан уни қайтарди!
3'
Верраттининг жарима майдони ичига узатган тўпини дарвозабон баланд сакраб ушлаб олди.
2'
ПСЖ илк дақиқаларни позицион ҳужум билан бошлади. Неймарнинг чап қанотдан бошлаган ҳужуми давом этмоқда.
1'
Учрашув бошланди!
0'
Футболчилар майдонга чиқиб келишмоқда. Ўйин бошланиш арафасида.
0'
Ассалому алайкум, қадрли футбол ихлосмандлари! Франция чемпионати 21-туридан ўрин олган "ПСЖ" - "Монпелье" баҳси бошланиш арафасида. Матнли трансляцияни Абдулла Маннонов олиб боради.