Икки марта операция столига ётган Рўзим Аҳмедов фаолиятини тугатмоқчи эмас

Ўтган мавсумда “Андижон” шарафини ҳимоя қилган ҳужумчи Рўзим Аҳмедов қишки йиғин чоғида бирор-бир клубда кўриниш бермади. Ҳолбуки, уни қайси жамоа аъзосига айланишини кутганлар бор эди. Аммо чемпионат ҳам бошланди, бугун, яъни, 7 март санасида юртимизда трансферлар ойнаси ёпилади. Хўш, унда Рўзим қаерда? Нега ҳалигача жамоасиз юрибди? Тахмин қилганимиздек, унинг ҳалигача жамоасиз эканлигига жиддий сабаб борлиги аён бўлди. Маълум бўлишича, футболчи охирги пайтларда соғлигини тиклаш билан овора бўлган ва шу кунгача икки марта жарроҳлик амалиётини ўтказган ҳолда операция столига ётган. Яхшиси, қолганини ўзидан эшитганимиз яхши.

- Ўтган йилги мавсумнинг охирги турида бизнинг “Қизилқум”га қарши ўйинимиз қалин туман тушганлиги сабабли бир кун кейин ўтказилганди. Ўша охирги учрашувда қўлим синиб, уйга гипсда қайтгандим. Декабрнинг охирида кўричак бўлиб қолиб, операция столига ётдим. Бир ойча даволаниб, энди тузалаётган пайтимда яна бир операцияни бошимдан ўтказишга мажбур бўлдим. Ҳолбуки, биринчи операциядан сўнг соғаяётганимда бир-иккита таклифлар бўлиб турганди. Афсуски, иккинчи операциядан сўнг энди ёзгача футбол ўйнашим мумкин эмас экан. Бирин-кетин икки марта жарроҳлик амалиётини бошдан ўтказиш осон эмас. Шифокорлар эса узоғи билан икки ойдан сўнг енгил машғулотлар қилиб туришим мумкинлигини айтишди. Шифохонадан яқинда чиқдим.

Соғлиқ доимо биринчи ўринда туришини ҳамма яхши билади. Аҳмедов ҳам бу борада аввало соғлигини биринчи ўринга қўйган. Лекин у ҳали фаолиятини тугатиш ниятида эмаслигини ҳам билдирди. Албатта, унга ўтган вақт давомида таклифлар ҳам бўлган, айниқса хориждан ҳам қулай шароитлар асосидаги чорловлар бўлганини ҳужумчининг қуйидаги сўзлари орқали билиб олиш мумкин.  

- Ҳа, менга Ўзбекистондан ҳам, хориждан ҳам таклифлар бўлди. Айниқса, Индонезия ҳамда Таиланддан яхши чорловлар бор эди. Лекин насиб қилмаган экан. Яқинда жамоасиз қолиб кетган футболчилар дея мени ҳам ёзиб чиқишибди. Шу сабабли водийлик ишқибозлар қўнғироқ қилиб, нима бўлди деб ҳол-аҳвол сўрашяпти. Лекин мен ҳали фаолиятимни тугатганим йўқ. Жамоасиз қолиб кетмадим. Қачонки, ўзим учун клуб топилмасагина ҳеч кимга қараб ўтирмасдан фаолиятимни тугатиб қўя қоламан. Бировга мени олинглар деб ёлвориб ҳеч қачон футбол ўйнамайман. Яна қайтараман, қачонки жамоасиз қолиб кетсам, шунда ҳеч кимга керак эмаслигим билинади ва шунда футболни тугатиш фурсати етганини сезаман. Ҳали яна бемалол 2-3 йил ўйнай оламан. Худога шукрки, менга чақирувлар бўлди. Аммо икки марта операция столига ётганим учун вақтинчалик ўйнай олмаслигим аниқ эди. Ўт қопи дегани бу ўта жиддий экан. Шунинг учун маълум вақт қатъий режимда бўлиб тураман. Соғайиб кетгунимча сабр қилиб тураман. Иккинчи даврага қайтишга ҳаракат қиламан.

Футболдан четга чиқиб қолган ҳужумчи ҳозир ўзини қандай ҳис қилаётганини тасаввур қилиш қийин эмас. Чунки унинг дўстлари, ҳамкасблари янги мавсумни бошлаб бўлишди. Бироқ Рўзим Аҳмедов мажбуран футболдан ташқарида юрибди. Бундай пайтда эса руҳий томондан осон эмаслигини тахмин қилиш мумкин.

- Доим қишки йиғинда бошланажак мавсумга тайёргарлик кўриб келардик. Бу сафар эса вазият шундай бўлиб қолгани сабабли албатта мен учун оғир бўлди. Янги чемпионат эса бошланиб бўлди. Бундай пайтда спортчида бироз бўлса ҳам тушкунлик бўлади. Аммо сабр қилиб тураман. Бундай пайтда мени қўллаб-қувватлаётганлар бўляпти. Мураббийлар, футболчилар, дўстларим руҳий томондан ҳам далда бўлиб туришибди.

Юқорида айтиб ўтганимиздек, Аҳмедовнинг охирги жамоаси “Андижон” бўлди. Футболчи эса кўпчилик қатори у ердан кетди. Ўз навбатида Аҳмедов у ердаги фаолиятини эсга олар экан, шундай деди:

- Ўтган йили “Андижон”да яхши ўйинчилар йиғилишганди. Таркиб ёмон эмасди. Йил бошида жамоамизга яхши эътибор берилганди. Кейин эса икки ойлардан кейин вазият ўзгаришни бошлади. Масалан, иккинчи даврада молиявий томондан қийинчиликлар кузатилди. Шунда ҳам футболчилар чидаб охиригача ўйнаб беришди. Ўйлайманки, бундай шароитда “Андижон”нинг 10-ўринни эгаллагани яхши натижа бўлди. Янги мавсумда андижонликларга омад тилайман.