Ilyos Zeytullaev: "80-daqiqagacha ham yutishimizga ishonib turgan edik"

Superliganing 8-turidan o‘rin olgan “Bunyodkor” – “Qo‘qon-1912” uchrashuvidan so‘ng mezbonlar ustozi Ilyos Zeytullaev o‘z fikrlari bilan o‘rtoqlashdi. 

"Nima ham deyish mumkin, albatta alamli mag‘lubiyat. Boz ustiga oxirgi daqiqada bu narsa ro‘y berdi. Kutilmagan mag‘lubiyat bo‘ldi deyish mumkin. 80-daqiqagacha ham yutishimizga ishonib turgan edik. Mavsumdagi birinchi mag‘lubiyatni qabul qilib oldik. Bu - futbol. Yutganimizda bugun qahramon bo‘lardik. 

“Qo‘qon-1912” ham oxirgi daqiqagacha kurashdi. Birinchi bo‘limda tempni ko‘tarishdi. Bunday jamoalar bilan o‘ynaganda o‘yinni o‘qiy olish kerak. 1:0 bo‘lib turgan pallada yana bitta to‘p kiritib bellashuvga nuqta qo‘yishimiz mumkin edi. Barcha narsa yopilardi. Penaltidan keyin biroz ruhan cho‘kib qoldik. Hamidullo Abdunabievning xatosini texnik xato bilan bog‘lash o‘rinlidir. Bu o‘yingacha juda yaxshi harakat qilib keldi, hechqisi yo‘q bo‘lib turadi", - dedi Zeytullaev. 

Ma’lumot uchun, "qaldirg‘ochlar" daslab, Temurxo‘ja Abduxoliqovning goli evaziga oldinda bora turib, ikkinchi bo‘limda ikkita gol o‘tkazib yuborib mag‘lub bo‘ldi.