Илёс Зейтуллаев: "Энг қийин ўйинни келаси турда ўтказамиз"

Суперлиганинг 7-туридан ўрин олган “Бунёдкор” - ОКМК жамоалари ўртасидаги учрашувдан кейин мезбонлар устози Илёс Зейтуллаев ўз фикрлари билан ўртоқлашди.

"Қизиқарли, томашабоп, вазиятларга бой ўйин гувоҳига айландик. Биринчи бўлим бизнинг устунлигимизда ўтгандир, аммо танаффусдан сўнг меҳмонлар класс намойиш қилди. Улар медаллар учун курашаётган жамоа, буни бугун исботлади. Мен футболчиларни ва бизни қўллаб-қувватлаган барчани табриклайман! Айниқса, турдан-турга сони кўпайиб бораётган мухлисларимизга ҳам раҳмат айтаман!

Гол ўтказмаётганинг яхши қўнғироқ, бу йигитларга ғолиблик руҳиятини беради. Албатта кам гол ўтказаётганимиз ҳимоячилар билан боғлиқдир, аммо бу ерда ҳужумчиларнинг меҳнатини ҳам эътироф этиш керак.

Биз ўйиндан-ўйинга тайёргарлик кўрамиз. Энг қийин учрашувимизни келаси тур “Қўқон-1912”га қарши ўтказамиз. Боиси, бугунги ғалабадан сўнг навбатдаги баҳсга руҳан тайёрланиш осонмас. Ҳақиқий жамоа бу каби беллашувлардан сўнг навбатдагисига одатий тарзда тайёрланади", - дейди Зейтуллаев.