"Интер Майами" Мессисиз ўйнашни ўрганиши керак...

"Интер Майами" бош мураббийи Херардо Мартино бугун бўлиб ўтган "Нью-Йорк Ред Буллз"га (2:0) қарши ўйинда ҳужумчи Лионель Мессининг иккинчи бўлимида  майдонга тушганига изоҳ берди.

“Ғалаба қозониш жуда муҳим. Биз ротация билан ўйнашга кўникишимиз керак, чунки Лео терма жамоа йиғинига қўшилиш арафасида. У бу йил камида учта ўйинни ўтказиб юборади ва кейинги йил ҳам шундай бўлади. У бу ерда бўлмаганида ҳам жамоа натижа кўрсатиши керак”, - деди Мартино МЛС расмий сайтига берган интервьюсида.

“Интер Майами” бугунги ғалабадан сўнг МЛСдаги 11 ўйиндан иборат мағлубиятли серияси якун топди. Кейинги турда жамоа "Нашвилл" билан учрашади. Ўйин 31 август куни бўлиб ўтади.