Иньяки Уильямс Испания Суперкубоги ҳақидаги сўзларига изоҳ берди

"Атлетик" ҳужумчиси Иньяки Уильямс Испания Суперкубогининг Саудия Арабистонида ўтказилиши ҳақида айтган гапларидан кейин ўз позициясини тушунтириб берди.

Аввалроқ футболчи қуйидагича фикр билдирган эди: "Саудия Арабистонида ўйнаш, юмшоқ айтганда, ёқимсиз. Миллий мусобақаларнинг хорижда ўтказилиши мухлислар учун қийинчилик туғдиради — гўё майдонга сафарда чиққанимиздек бўлади".

— Балки ишлатган сўзим энг тўғриси эмасдир, барибир мураббийда бундай вазиятларда кўпроқ тажриба бор. У журналистлар олдига чиқишдан олдин мен билан гаплашди ва вазиятни юмшатишга ҳаракат қилишини айтди — шундай ҳам бўлди. Эҳтимол, сўзларим унчалик ўринли бўлмаган, аммо мен бундан афсусланмайман.

Мен доимо клуб ва энг аввало мухлисларимиз учун фойда қидираман. Шу воқеаларга қараб, баъзан очиқ гапирганда ҳам эҳтиёткорроқ бўлиш кераклигини тушунасан. Ҳа, ишлатган сўзим энг тўғриси эмас эди, аммо бу муаммо аввало мухлисларимиз учун, қолаверса, ҳамма учун ноқулайлик туғдираётгани рост.

Мен гапирганимда кўпинча хатога йўл қўйишим мумкин, чунки ростгўй бўлишга ҳаракат қиламан. Балки шакл тўғри танланмаган, аммо бу ҳолат барчамиз учун ҳақиқатан ҳам ноқулайлик яратади, — деди Уильямс.

Эртага "Атлетик" Испания Суперкубогининг ярим финалида "Барселона"га қарши майдонга тушади. Учрашув соат 00:00'да бошланади.