Исак "Ливерпуль" футболчиси сифатида илк интервьюсини берди

"Ливерпуль" "Ньюкасл" ҳужумчиси Александер Исакни 125 миллион фунт эвазига ўз сафига қўшиб олди. Швециялик форвард расмий имзодан сўнг таассуротлари билан ўртоқлашди:

"Ўзимни ажойиб ҳис қиляпман. Бу узоқ йўл бўлди, аммо бу жамоанинг, бу клубнинг ва унинг барча қадриятларининг бир қисми бўлишдан жуда хурсандман. Бундан фахрланаман ва ишга киришишни сабрсизлик билан кутяпман.

Ҳаммаси тугаганидан, энди ишга қайта олишимдан бахтиёрман. Жамоадошларим ва мухлислар билан учрашиш, майдонга қайтишни интизорлик билан кутяпман.

Мен жамоага кўп нарса бероламан деб ўйлайман, ўзим устида ишлашим керак бўлган жиҳатлар ҳам бор. Мен ҳужумчи сифатида асосан гол урмоқчиман, лекин фақат шу эмас — ҳар томонлама фойда келтиришни истайман.

Мен ҳаммасини ютишни хоҳлайман. Ҳа, айнан шундай", — дея таъриф бериб ўтди мерсисайдликларнинг янги ҳужумчиси.