Ишлайдиган схема ёхуд анъанага айланган ҳолат. "Ливерпуль" амалга ошираётган трансферлар ҳақида
"Ливерпуль" УЕФА Чемпионлар лигаси чорак финалида "Бенфика"га қарши ўйин ўтказди. Португалияда ўтган беллашувда "қизиллар" 3:1 ҳисобида рақибдан устун келганди. "Бенфика"нинг ягона голига Нуньес муаллифлик қилди. Жавоб ўйинида 3-3 ҳисоби қайд этилди. Португалларнинг бир голига яна Дарвин муаллифлик қилди. Клопп ушбу икки баҳсдан сўнг шундай деганди:
- Жуда ажойиб йигит, тўғрими? Шунингдек, ўз ишининг устаси бўлган футболчи. Мен у ҳақда фақат яхши гаплар айтишим мумкин. Унинг нималарга қодир эканлигини билардим. У Конате билан қийин дуэлларда иштирок этди ҳамда вазиятларни совуққонлик ва хотиржамлик билан якунлади. Агар у шундай темпда давом этса, Нуньесни катта марралар кутиб турибди. 
Айни вақтда у Мерсисайд клуби футболчисига айланиб улгурди. Бу анъанавий схема. "Ливерпуль"га гол урган айрим футболчилар кўп ўтмай, шу клуб футболчиси бўлмоқда. Келинг, аввал содир бўлган ҳолатлар билан танишиб чиқамиз.
Садио Мане
Сенегаллик "Ливерпуль"дан олдин "Саутгемптон"да ўйнагани борасида кўпчилик билса керак. У 2015/2016 йилда Клопп жамоасини анчагина қийнаб қўйган. Лига кубогида Манега ҳисобни очиш учун 39 сония кифоя қилган. Тўғри, якунда унинг жамоаси 1:6 ҳисобида мағлуб бўлган, лекин АПЛ доирасидаги икки беллашувда Садио мерсисайдликларнинг қимматли очколарини тортиб олишга муваффақ бўлган. Сафарда у жамоаси билан 1:1 ҳисобидаги дурангга эришган бўлса, ўз майдонида ўтган ўйинда камбэк амалга оширилган. Дастлаб, Клопп жамоаси 2:0 ҳисобида олдинга ўтиб олган. Бироқ якунда Маненинг дубли ҳамда Грациано Пелле томонидан урилган гол эвазига Сент-Мэрис аренаси эгалари ғалаба қозонган.
Кўрсатилган ажойиб ўйинлардан сўнг, "Ливерпуль" уни кўп ўтмай, аниқроғи, 3 ойдан кейин ўз сафига қўшиб олди. Мане ўша вақтда африкалик энг қиммат футболчига айланди (34 миллион фунт стерлинг).
Муҳаммад Салоҳ
Маненинг рекордини келаси йили Салоҳ янгилади. Уни "Ливерпуль" 36.5 миллион фунт стерлингга харид қилди. Ушбу трансфер нафақат африкалик, балки, ўша вақтда клуб тарихидаги энг қиммат трансферга айланди.
2016 йилнинг августида Муҳаммад мавсум олди ўртоқлик учрашувида "Рома" сафида "Ливерпуль"га қарши ўйинда ғалаба голини киритган. (2:1) Шундан сўнг римликлар уни "Челси"дан тўлиқ сотиб олган. Бироқ улар мисрлик иқтидор эгасини А Серияда атиги бир йилга сақлаб қола олди.
Такуми Минамино
Клубга яқин манбаларнинг ёзишича, "қизиллар" ўша ўйиндан кейин тезда музокараларни бошлаган. Декабрдаги жавоб учрашуви ҳаммаси тўғри давом этаётганига ишора қилди. У шериклари учун ажойиб вазиятлар яратди. Эртаси куни машғулотларда Ван Дейк ва Хендерсон Клоппга мурожаат қилиб, жамоа раҳбарларидан Минаминони сотиб олиш борасида таклиф билдиришини сўради. Бунга жавобан немис фақат кулиб қўйди. Сабаби, музокаралар аллақачон якуний босқичда эди.
Луис Диас ва Диогу Жота
Ўтган йили колумбиялик футболчи "Порту"да "Ливерпуль"га қарши икки бор ўйнаган. У ҳар икки учрашувда ҳам самарали ҳаракатлар муаллифига айлана олмади. Шундай бўлса-да, Диас намойиш этган футбол Клоппни ҳайрат осмонига етаклади. Вингер қишда 37.5 миллион фунт стерлинг эвазига "қизиллар" сафига кўчиб ўтди. Ўз ўрнида, Клопп португалиялик вингер борасида жуда илиқ фикрлар билдирди.
- Луис Диас биз узоқ вақтдан бери кузатиб келаётган ажойиб футболчи. Жорий мавсум бошида унинг қанчалик хавфли эканлигини, тезкорлигини ва феъл-атвори орқали жамоасига ёрдам бера олишини кўрдик. Ўйлаймизки, у бизнинг ўйинимизга мослашиш ва Премьер-лигада ҳам жисмоний ва руҳий томонлама ўсишга қодир футболчи.
Диогу Жота бир марта портлади. 2019 йилда "Вулверхэмптон" "Ливерпуль"ни Англия кубогининг 1/16 финал босқичидаёқ чиқариб юборди. (2:1) Жота мазкур беллашувда урилган илк голга ассист вазифасини бажарганди.
"Ливерпуль" айни вақтда дунёнинг энг кучли жамоаларидан бири. Бу клубга кўплаб ўйинчилар иқтидор сифатида келади ва юлдуз бўлиб етишади. Буларнинг барчаси жамоада трансфер сиёсати яхши ишлаётганидан далолат. Клопп келганидан кейин "қизиллар" ҳимояси анчагина тартибли ўйнайдиган бўлиб қолди. Бу мудофаа чизиғини ёриб ўтиш у қадар ҳам осон эмас. Агар рақиб жамоа сафида кимдир бу ишни уддаласа, немис мутахассиси унга қойил қолганини таъкидлайди ва кўп ўтмай ўша футболчини "Ливерпуль" сафида кўриб қолишимиз мумкин. Клопп яратган механизмни бузиб юборишга қодир ўйинчилар унинг ўзига керак. Шунда мазкур механизм яна ҳам мукаммаллашади.
Худайқулов Карим мақоласи
Фикрлар