Ислом Исмоилов: "Жамоа 3 йил бир хил схемада ўйнаган. Энди ундан олиб чиқиб кетиш учун вақт талаб қилади"

Туркияда йиғин ўтказаётган “Нефтчи” клуби бугун навбатдаги ўртоқлик учрашувини Словениянинг “Алюминий” жамоасига қарши ўтказди. Ўйин 2:1 ҳисобида фарғоналикларнинг фойдасига ҳал бўлди.

Учрашувдан кейин “Нефтчи” бош мураббийи Ислом Исмоилов клуб матбуот хизматига фикрлари билан ўртоқлашди.

"Учрашувга тўхталсак, ўйлашимча, яхши ўйин бўлди. Рақиб ҳам Словенияни яхши жамоаларидан бири эди. Амалга оширишимиз керак бўлган нарсаларни босқичма-босқич йўлга қўйяпмиз. Қилмоқчи бўлган ғояларимизни футболчиларимиз ўқиб, тушуниб оладиган бир китоб эмас. Бунга вақт керак бўлади. Жуда кўп нарсаларни ўзгартиришга ҳаракат қиляпмиз. Лекин футболчиларга раҳмат айтаман. Максимал даражада ҳаракат қилишди. Қўйилган вазифаларни бажаришга интилишди.

Иккинчи таймда кўпроқ ёшларга имконият бердик. Бу ҳам керак. Аста-секинлик билан жамоадаги ёшларда ўзларига бўлган ишончни орттириб боришимиз лозим. Шунинг учун ҳар учрашувда ёшларга ҳам имконият бериб боришга ҳаракат қиляпмиз. Бугун ҳам таркибимизда 6 нафар 17-18 ёшдаги йигитлар тўп суришди. Албатта, бу жамоани келажаги учун фойдали ҳолат.

Қолган легионерларга келадиган бўлсак, Ратиньо жароҳатидан энди тузалиб, тикланиш жараёнида. Нимели виза муаммоларини ҳал қилиб, бугундан жамоага етиб келди. Улар ҳам тез кунда жамоага тўлиқ киришиб кетишади.

Ўйиндан тўлиқ қониққанимиз йўқ. Қиладиган ишларимиз жуда кўп. Ўйин сифатини яхшилашимиз керак. Таркибимиздаги футболчилар керак бўлса бундан 3-4 баробар яхшироқ ўйин намойиш эта олишади. Ҳозир ғояларимизни уларга сингдириш учун фақат вақт керак. Уларга ҳам мураббийлар штабини ва мени янги талаб қилаётган ўйин услубимни тушунишлари учун вақт керак. Сабаби, жамоа уч йил давомида бир хил схемада ҳаракат қилган. Энди ундан жамоани олиб чиқиб кетиш учун катта вақт ва меҳнат талаб қилади. Биз тўхтаб қолмаймиз. Худо хоҳласа, жамоа мавсумга ўзини энг юқори оптимал формасида етиб келади", - дейди Исмоилов.