Ислом Махачев - Александр Волкановски ким ғалаба қозонади? (Сўровнома, 2-қисм)

12 февраль куни Австралиянинг Перт шаҳрида “UFC 284” турнири ташкил этилиши ва марказий жангда Ислом Махачев ҳамда Александр Волкановски тўқнаш келиши ҳақида хабар берганмиз ва айнан ушбу воқелик борасида ўзбек яккакураш олами вакилларининг фикри билан қизиқиб, 1-қисмини эътиборингизга ҳавола этгандик. Навбат 2-қисмига...

Аюбхон Камолов – ММА жангчиси (Ўзбек ММА оламининг фахрий вакили)

- Бу вазн тоифа Исломники, Волкановски барибир кичик вазндан кўтаради. Уни ҳам ёмон демоқчимасман. У ҳам ўз дивизионининг мутлақ чемпиони. Аммо бу вазн тоифасига Ислом яхши мослашган. Шунинг учун унда имконият кўп. Қолаверса, биз ҳам Исломга мухлислик қиламиз. Чунки, юртимизга кўп ташриф буюрган, диндошимиз, хулқи ҳам чиройли деб биламан. Унинг ғалаба қозонишига умид қиламиз ва ишонамиз. Яна муҳим жиҳати, Исломнинг олдида жуда яхши мураббийлар йиғилган, унда мактаб яхши шаклланган ва шунгга монанд жанг олиб боради. Агар, тасодиф юзага келмаса, Волкановскида имконият жуда кам. 90/10 деган бўлардим.

Отабек Мусаев – Ўзбекистон ММА ассоциацияси ҳакамлар қўмитаси раиси

- Бу жангда Ислом Махачев 1-раунд охири ёки 2-раундда “сабмишен” билан ғалаба қозонади. Махачев тактик жанг олиб боради, асосан 2-рақамли бўлиб, Волкановски эса жангни хужумда ўтказади ва юқорида айтганимдек, бу баҳс узоққа чўзилмайди.

Нурсултон Рўзибоев – ММА жангчиси

- Тўғриси, Волкановски ҳам зўр жангчи, гап бўлиши мумкинмас. Бироқ, барибир вазни ва бўйи кичик. Бу унинг учун жуда ҳам минус жиҳат. Исломга эса аксинча устунлик беради. Кейин, курашда ҳам Исломга бас кела олмайди. Исломни “стойкаси” ҳам Волкановскидан қолишмайди. Имкониятларни 70/30 ҳам демаган бўлардим. Ислом яққол устунлик билан ғалаба қозонади.

Марат Бекмуратов – менежер (Қирғизистон)

- Бу жангда қисман Ислом Махачев фаворит бўлиб чиқади. Бироқ, Волкановскига етарли баҳо бермаслик салбий оқибатларга олиб келади. Алексни “тэйк-даун”лардан ҳимояланиши кучли, курашга киришига осонликча йўл қўймайди. Лекин Ислом уни сеткага ёпиштириб, амаллаб “партер”га тушира олиб, икки раунд чарчатса, 3-4 раундларда Волкановски қаршилик кўрсата олмаса керак. Алексда ғалаба қозониш имконияти жуда паст.

Дадахон Ҳасанов – ММА жангчиси, рефери

- Икки кучли жангчилар бизга чиройли ва қизиқарли баҳсни тухфа этади. Александр Волкановски ўз уйида  Австралияда жанг қилади. Қисман бу ҳам унга қўшимча куч-қувват бағишлайди. Аммо, Ислом Махачев барибир ўз вазн тоифасида ҳаракат қилади. Унинг устунлик жиҳатлари кўп. Шунинг учун Махачевда имконият яхши. Имкониятларни 60/40 дея баҳолаган бўлардим.

Мавлуд Тифиев – муайтай, ММА жангчиси

- Яхши ва қизиқарли жангни гувоҳига айланамиз. Менимча бир-бирига муносиб рақиблар дея оламан. Чунки Волкановскида қаршилик кўрсата олиш имконияти бор. Бироқ, Исломни кураши барибир ҳал қилувчи роль ўйнаса керак. Ислом Махачев ғалаба қозонади. Албатта, бу шахсий фикрим!

Ҳумоюн Ибрагимов – ММА жангчиси

- Бу жанг ҳақида фикр юритадиган бўлсак, 70/30 Ислом фойдасига деган бўлардим. Агар, жанг 3-раунддан ўтса, Волкановски ғалаба қозонади. Бироқ, бунга Ислом йўл қўймаса керак. 2-раундда техник нокаут билан ғалаба қозонади, деб ўйлайман.

Машрабжон Рўзибоев –ММА жангчиси

- Албатта яхши ва қизиқ жанг бўлади. Барчаси октагонда ҳал бўлади. Кимни ғалаба қозонишини олдиндан айтиб бўлмайди. Фақат, имкониятлар борасида Ислом Махачев устунроқ, деб биламан.

Элдор Эронов – ММА жангчиси

- Волкановскини қанчалик кучли жиҳатини гапирмайлик. Барибир бу жангда Ислом Махачевнинг имконияти анчагина юқори. Чунки, у ўзи мослашган вазн тоифасида жанг қилади. Қўллари, бўйлари узун, кураши анчагина кучли. Шундай экан, бу баҳсда Махачев ғалаба қозонади, деган фикрдаман.

Жаҳонгир Нажмиддинов – ММА жангчиси

- Александр Волкановски Махачев учун жуда қийин рақиб бўлади, деб ўйлайман. Ҳақиқатдан Махачев учун осон жанг бўлмайди. Аммо, Исломда устунлик томонлар кўп ва барибир у ғалаба қозонади, деган фикрдаман.