Ислом Тўхтахўжаев "Ал-Садд" устидан қозонилган ғалаба ҳақида нима дейди?

Кеча Қатар Юлдузлар лигасида ”Ал-Гарафа” клуби сафарда “Ал-Садд” устидан 1:2 ҳисобида ғалаба қозонди. Учрашувда ҳамюртимиз Ислом Тўхтахўжаев “Ал-Гарафа” сафида тўлиқ иштирок этди.

Баҳс якунига етганидан кейин легионеримиз Sports.uz учун таассуротлари билан ўртоқлашди.

- Аввало, ғалаба билан табриклайман. Қийин ўйин бўлди, аммо “Ал-Гарафа" ютди. Қандай таассурот қолди?

- Раҳмат. Учрашув қийин бўлишини олдиндан билиб тургандик. Худога шукр, омадимиз келиб, ғалаба қозондик.

- Ўтган турда “Ал-Шамал”ни 1:0 ҳисобида ютаётиб якунда 1:2 ҳисобида ютқаздинглар. Шундан кейин руҳий тарафдан тикланиш қийин кечмадими? Боз устига бу сафарги рақиб “Ал-Садд” эди...

- Футболда бўлиб туради. Унда доим ғалаба билан мағлубият ёнма-ён юради. Бундай жамоаларга қарши ҳамма астойдил тайёрланади.

- “Ал-Садд”дан Родриго Табата 29-дақиқада майдондан четлатилди. Рақибни бир киши кам бўлиши ғалабада муҳим роль ўйнадими ёки...

- Менимча, ҳа. Чунки 10 кишига қарши ўйнаш албатта осонроқ.

- “Ал-Гарафа”га қанчалик мослашдингиз? Жамоадошларингиз сизни нима деб чақиришади ва ҳозирда яқин дўстингиз ким?

- Жамоага киришиб кетишим қийин бўлгани йўқ. Бизнинг жамоа жуда аҳил, барча футболчи билан муносабатим ажойиб. Ҳамма бу ерда ўз исмим билан чақиради.

- Бош мураббий сиздан нимани талаб қиляпти? Умуман, Андреа Страмаччони қандай мураббий экан?

- Жуда ажойиб мураббий. Фақат футбол ўйнашни талаб қилади. Ҳар доим футболчиларни қўллаб-қувватлайди. Мағлубиятга учраган пайтимизда ҳам катта далда беради.