Испанияда ютмаган ва ютқазмаган биттадан жамоа қолди

Испания чемпионатининг саккизинчи туридан кейин рақибларига имкониятни бой бермаган ва ҳали ғалаба нашидасини сурмаган биттадан жамоа қолди.

Еттинчи турдан кейин “Жирона” фақатгина бир учрашувда дуранг ўйнаб, қолганларида рақибларини ер тишлатган ҳалда пешқадамлик қилаётган эди. “Реал” жамоаси “Жирона” майдонига бориб, мезбонлар дарвозасига жавобсиз тўртта тўп киритди ва пешқадамликни тортиб олди.

Шу тариқа, “Жирона” илк мағлубиятини тан олди. Енгилмаганлар сони биттагача қисқарди. Ҳозирча, “Барселона”ни курагини ерга теккизадигани топилмаяпти. Хави Эрнандес шогирдлари саккизта учрашувдан олтитасида ғалаб қозонган ва иккитасида очко бўлишган.

Ла Лигада ҳали бирор марта ғалаба қозонмаган ягона клуб “Альмерия” бўлиб турибди. Бу жамоа ҳужумчиси Луис Суарес беш дақиқа ичида “Гранада” дарвозасига учта гол урганидан кейин мухлислар ғалабани нишонлашга киришиб кетганди. Бироқ рақиб ўйиннинг иккинчи ярмида ҳисобни тенглаштиришни уддалади.