Жаҳон чемпионати стартига қадар 30 кун! Бу гал Мане бошчилик қилаётган, сардори Кулибали бўлган Сенегал ҳақида гаплашамиз

Қатар мезбонлигидаги Жаҳон чемпионати стартига тобора оз вақт қолмоқда. Биз ўз одатимиз бўйича мазкур мундиалда иштирок этадиган жамоалар билан таништиришда давом этамиз. Демак, ЖЧга 31 кун қолган бир пайтда "А" гуруҳининг 3-жамоаси - Сенегал ҳақидаги маълумотлар билан ўртоқлашамиз. Бунгача мезбон Қатар ҳамда Эквадор тўғрисида суҳбатлашгандик.

Жамоа ҳақида

Сенегал терма жамоаси, Сенегал футбол федерацияси (FSF), лақаби - "Теранга шерлари".

Ташкил топган йили: 1960 йил (ФИФАна 1964 йилда аъзо бўлган)
Бош мураббийи: Алиу Сиссе
Жамоа сардори: Калиду Кулибали

Илк расмий учрашуви: Бенин - Сенегал 2:3 (1961)
Энг йирик ғалаба: Сенегал - Мауритания 10:1 (1972 йил)
Энг йирик мағлубият: Гвинея - Сенегал 5:0 (1966 йил).

Сенегалликлар айни пайтда ФИФА рейтингида 18-поғонани эгаллаб турибди. Бу жамоа тарихидаги энг яхши кўрсаткич ҳисобланади. Энг ёмон натижа эса 2013 йилга тўғри келади, ўшанда улар 99-ўрингача тушиб кетган.

"Теранга шерлари" илк бор 2002 йилги Жаҳон чемпионатида қатнашган. Жанубий Корея ва Япония мезбонлик қилган ўша мундиалда африкаликлар ўта муваффақиятли иштирок этган ва ўзларининг энг яхши натижасини қайд этган, чорак финал.

Сиссе шогирдлари айни пайтда расман Африканинг энг яхши жамоаси ҳисобланади. Улар ўтган йили ўтказилган Африка Миллатлар кубоги финалида Мисрни мағлуб этиб, бош совринга эга чиққан.

Турниргача босиб ўтган йўли

Сенегалликлар Қатарга ўз қитъасининг энг кучли термаси сифатида ташриф буюради. Бу ҳам уларнинг зиммасига катта масъулият юклаши турган гап. Турнир давомида бирор марта мағлубиятга учрамагани ҳам бунинг исботи бўлиши аниқ.

Бундан ташқари, Мане бошчилигидаги таркиб руҳия томондан ҳам анча кучли саналади. Улар кетма-кет икки бор Мисрни пенальтилар сериясида енгганди. 

Шундан сўнг Сенегал ўтказилган 7 учрашувнинг 3 тасида ғалаба қозонди, яна шунча баҳсда дуранг ўйнади. Фақатгина Жанубий Африка Консуллиги кубоги ярим финалида Замбияга имкониятни бой берган, 3:4.

Охирги баҳсини қитъамиз етакчиларидан бири Эронга қарши ўтказган сенегалликлар 1:1 ҳисобидаги дурангга имзо чеккан. ЖЧ стартига қадар Сиссе шогирдлари Қозоғистон миллий терма жамоасига қарши назорат ўйинида майдонга тушиши кутилмоқда. Баҳс санаси ҳақида аниқ маълумот йўқ.

Таркиб

Жаҳон чемпионатига борадиган футболчиларига эътибор қаратсак, анчагина катта номларни кўришимиз мумкин. Садио Мане, Калиду Кулибали, Исмаила Сарр, Абду Диалло каби номларнинг ўзи ҳам уларнинг қанчалик қудратли эканини кўрсатиб турибди. Жамоанинг умумий трансфер қиймати ҳам каттагина - 286,5 миллион евро.

ЖЧ-2022'даги тақвими

Сенегал Қатардаги Жаҳон чемпионатининг "А" гуруҳида, тартиб бўйича 3-жамоа саналади. Уларнинг тақвими қуйидагича:

21 ноябрь

Сенегал - Нидерландия

25 ноябрь

Қатар - Сенегал

29 ноябрь

Эквадор - Сенегал.