Жаҳонгир Меҳмоновнинг "Навбаҳор"дан нега кетгани, бир йиллик келишув ва қулай таклиф ҳақида

Термизнинг “Сурхон” клуби янги мавсумга тайёргарлик кўриш жараёнида таркибини янада кучайтириб бормоқда. Айниқса, “Навбаҳор”дан бир қатор етакчи бўлган футболчиларни жалб қилишмоқда. Айтайлик, бунга қадар наманганликлар шарафини муносиб ҳимоя қилиб келган Жаҳонгир Меҳмоновни тилга олишимиз мумкин. “Навбаҳор”да жамоа сардори сифатида ҳам фаолият олиб борган ҳимоячи эндиликда Термизнинг “Сурхон” жамоасида тўп суради. Аввалига унинг бу клубга ўтиш ёки ўтмаслиги ҳам айрим муҳокамаларга сабаб бўлганди. Боиси аввалига Меҳмоновнинг расман “Сурхон”га ўтганлиги ҳақида хабар чиққанди. Лекин дарҳол футболчи бунга муносабат билдириб, ҳали “Навбаҳор”дан кетмаганини маълум қилганди. Шунга қарамасдан орадан бироз вақт ўтганидан кейин Жаҳонгирнинг барибир “Сурхон” аъзосига айланганлиги расман ўз тасдиғини топди. Шундан кейин футболчи термизликларнинг машғулотларида қатнаша бошлади.

- Бунгача фаолиятимни водийда ўтказиб келдим. Энди эса олдингидек ёш эмасмиз, - дея гап бошлади, Меҳмонов. - Озми-кўпми, профессионал футболчига айландик. Қаерда яхши таклиф бўлса, ўшани кўриб чиқамиз. Инкор этмайман, менга хориждан ҳам аниқ таклифлар бўлганди, аммо улар билан келиша олмадик. Бу борада Малайзия, Таиланд, Индонезия ва араб клубларидан қизиқишлар бор эди. Ўзимизнинг клублардан ҳам таклифлар бўлгани рост. Лекин “Сурхон” менга аниқ ва жиддий таклиф билан чиққани учун ўзимни у ерда синаб кўришга қарор қилдим. Энди қўлимиздан келганича янги жамоамга ёрдам беришга ҳаракат қиламан. Бу йил “Сурхон”нинг мақсадлари катта.

Чиндан ҳам Меҳмоновнинг олдида четдан ҳам вариантлар бор эди. Шу боис унинг легионер мақомига айланиши ҳеч гап эмасди. Балки у молиявий ва яна айрим масалаларда келиша олмагандир. Бироқ “сурхон”дагилар унинг кўнглига йўл топа олдилар. Демак, бундан чиқди, Жаҳонгирга молиявий томондан яхшигина таклиф билдиришган бўлишса ажаб эмас. Буни футболчининг ўзи ҳам тасдиқлаб шундай деди:

- Албатта, менга “Сурхон”дагилар бошқалардан кўра яхшироқ таклиф билдиришди. Уларнинг менга яратиб берадиган шароити хориж клубларининг таклифига яқинроқ эди. Шу боис термизликлар билан ишлашга рози бўлдим. Бу ерда олдин бирга ўйнаган дўстларим ҳам бор. Аъзам Алиев, Дарко Станоевич, Дилшод Жабборов ва яна бошқа футболчиларни айтишим мумкин. У ердаги таркиб менга таниш. Бундай муҳитда эса янги жамоага мослашишда ҳам қийналмайман.

Шунингдек, собиқ жамоаси – “Навбаҳор”ни ҳам пул учун тарк этганмиди, деган савол туғилиши мумкин. Бу борада гап кетар экан, Меҳмонов ушбу масала бўйича ҳам ўз муносабатини билдирди.

- “Навбаҳор”даги фаолиятим давомида менга бошқа клублардан яхши таклифлар бўлган пайтида ҳам жамоани ташлаб кетмагандим. Масалан, менга ўтган йили ҳам, ундан аввалги йилда ҳам ҳар томонлама қониқарли таклифлар бўлган. Шунда ҳам “Навбаҳор”да қолиб ёрдам беришга қарор қилганман. Ўша пайтларда клуб ҳам юқори ўринларга кўтарилаётганди ва бу борада биз ҳам ўз ҳиссамизни қўшишни истаганмиз. Шунинг эвазига бошқа таклифларга умуман эътибор ҳам бермаганмиз. Ўша пайтда молиявий ҳолат биз учун муҳим роль ўйнамаганди. Энди эса клубни ва муҳитни ўзгартириш фурсати келганди. Ўз кучимни ҳам бошқа жамоада синаб кўришни истаётгандим. “Навбаҳор” раҳбариятидан менинг кетишимга рухсат беришларини илтимос қилдим. Тўғри, улар бошида менинг кетишимга қарши чиқишди. Аммо кейинчалик вазиятни тўғри тушунишди. Бунинг учун уларга ўз миннатдорчилигимни билдириб қоламан.

Қизиқ, Жаҳонгир Меҳмоновни “Сурхон”га айнан ким таклиф қилган? Бу борада ҳам тахминлар йўқ эмас. Бунга ойдинлик киритиш учун футболчининг ўзига мурожаат қилдик.

- “Сурхон” раҳбари таклиф билан чиқди. Қолаверса, у ерда собиқ жамоадошларим ҳам ўйнашаётгани менинг у ерга ўтишимга ҳам туртки бўлишди. Клубга ўтишдан олдин ўшалар билан ҳам гаплашдим. Биз бир-биримизни тўғри тушундик.

Наманганда анча муддат фаолият олиб борган Меҳмонов “Навбаҳор”ни қандай тарк этди? Клубдагилар ёки бошқалар билан ораларида хафагарчилик ўтмаганмиди? Умуман, у ердан кетишига нима сабаб бўлди? Мазкур масала бўйича ҳам ҳимоячига мурожаат қилдик.

- Бу вазиятда ҳеч қандай хафа бўладиган ҳолат йўқ. Футболда ҳамма нарса бўлади. Ўтган мавсумнинг биринчи даврасидан кейин жамоамизда айрим муаммолар бўлганди. Бироз қийналдик. Клуб ҳам пастки ўринларга тушиб кетди. Албатта, раҳбарият биздан кўп нарсани талаб қилади ва бу борада улар ҳақли. Афсуски биз олдимизга қўйилган вазифани уддалай олмадик. Гапнинг очиғи водий футболидан бироз четга чиқишни хоҳладим. Умуман айтганда, “Навбаҳор”да ўйнаганимдан хурсандман. Бирга тўп сурган футболчилар жуда ажойиб эди. Айниқса, учинчи ўринни эгаллаб тарихга кирганимиздан жуда мамнунман. Адашмасам, ўшанда бронза медалини қўлга киритганимизга 18 йил бўлганди. Ўшанда клуб таркибида қайси футболчилар ўйнашган деган савол бўлса, бизнинг ҳам номимиз кўрсатилади. Ўз навбатида бу жамоага миннатдорчилик билдираман.

Шу ўринда футболчи “Навбаҳор”да бирга ишлаган россиялик мутахассис Андрей Канчельскиснинг клубдан кетишига алоқаси йўқлигини айтиб, у ҳақида ижобий фикрлар билдирди.

- Олдин ҳам айтганимдек, менинг Канчельскис билан ҳеч қанақа муаммоим йўқ. У яхши мураббий ва доим Канчельскис ҳақида илиқ фикрдаман. Одамгарчилик томонидан ҳам у ажойиб мураббий. Ўйлайманки, бош мураббий ҳам менинг қароримни тўғри тушунди.

Наманганлик мухлисларнинг қанчалик талабчан эканлигини ҳамма яхши билади. Аслида бундай талабчан ишқибозлар қаршисида ўйнаш ҳам осон эмас. Сиздан фақат ғалабани талаб қилаётган бир пайтда бу футболчига ортиқча босим ҳам юклаши мумкин. Мухлислар эса “Навбаҳор”га келган ва кетган ҳар бир ўйинчига ҳам ўзига яраша муносабат билдирадилар.

- Ҳозир ҳам айрим мухлислар қўнғироқ қилиб ҳол-аҳвол сўраб туришади ва кейинги фаолиятимда омад тилашяпти. “Навбаҳор”да қолмаганимга бироз хафа ҳам бўлишди. Албатта, беш қўл баробар эмас. Кимгадир ёқасиз, кимгадир ёқмайсиз. Мен эса ҳаммага фақат яхшилик тилайман, ҳеч кимга ёмонлигим йўқ, - дея ишқибозлар ҳақида фикр билдирди, Меҳмонов.

Шунингдек, клубларга қўшилаётган янги ўйинчиларнинг аксарияти фақат бир йилга мўлжалланган шартномаларни имзолашмоқда. Жаҳонгир Меҳмонов ҳам бошқалар қатори “Сурхон” билан мавсум охиригача келишувга эришган. Лекин нима учун кўп йиллик битимлар имзоланмаяпти? Ёки клуб ва футболчи бир-бирига у қадар ишонмайдими? Аммо Меҳмонов ушбу масала ҳақида гапирар экан, бир йиллик шартнома нисбатан қулайроқ эканини ҳам яширмади.

- “Сурхон” билан бирга йилга шартнома туздим. Менимча, иккала томонга ҳам бир йиллик келишувга эришиш маъқул келса керак деб ўйлайман. Балки шунинг ҳисобига аксарият клублар ва ўйинчилар ўзаро келишган ҳолда бир мавсумлик шартномалар тузишаётгандир, яна билмадим. Балки кимгадир кўпроқ муддатга шартнома таклиф қилинар. Менга эса бир йиллик шартнома қулай дейишим мумкин.