Энди уларга Мбаппе эмас, Ҳусанов керак!
Ўзбекистон миллий терма жамоаси Марказий Осиё мамлакатлари орасида биринчи бўлиб жаҳон чемпионатида иштирок этиш ҳуқуқини қўлга киритди.
Нуфузли манба – Transfermarkt портали бош жамоамизнинг мундиал саралаш турниридан муваффақиятли ўтишига ўз ҳиссасини қўшган ёрдами мураббий Алеш Чехнинг фикрларини эълон қилди.
Таъкидалаш жоизки, 57 ёшли Алеш Чех футболчилик фаолияти давомида Словениянинг “Олимпия” ва “Марибор”, Австриянинг “ГАК” ва “ЛАСК” клубларида ўйнаган. Словения терма жамоаси сафида 74 та учрашувда қатнашиб, битта гол муаллифи бўлган. Ўз юрти терма жамоаси сафида Алеш Чех 2000 йилги Европа чемпионати ва 2002 йилги жаҳон чемпионатида иштирок этган.
Тажрибали мураббий 2021 йили ўша пайтдаги бош мураббий Сречко Катанец таклифи билан Ўзбекистон миллий терма жамоаси мураббийлар штабида иш бошлаган эди.
Sports.uz портали Алеш Чехнинг Transfermarkt портали вакилларига билдирган фикрларини ўзбекистонлик футбол ишқибозлари эътиборига ҳавола этади.
- Тўғрисини айтганда, ҳозир ҳам тилим айланмай қолади. Ўзбекистон жаҳон чемпионатига чиққанидан кейин енгиллик, фахр-ифтихор ва мутлақ хурсандчиликни ҳис қиляпман. 2023-2024 йилги ўйинлар натижаларига эътибор берсак, уларда атиги икки мартадан мағлуб бўлдик. Натижа – жаҳон чемпионатига чиқдик.
Ўзбекистонга боришимни билган бир неча дўстларимнинг маслаҳатларини олишимга тўғри келди. Мен тажрибамга таянган ҳолда Австриядан яхши иш топишим осон эди. Лекин Ўзбекистон лойиҳаси жуда қизиқарли кўринди. Ўзбекистонни жаҳон чемпионатига олиб чиқишга ҳаракат қилаётганимизни айтганимда, изоҳлар янада кўпайди. Бу ишни уддалаганимиздан кейин мен ўзимни янада кўпроқ бахтиёр ҳис қиляпман.
Бошида терма жамоа ўйинчилари билан танишиш учун машғулот лагерини туздик. Кечки овқатдан кейин айрим ўйинчилар “Эртага кўришамиз”, деб хайрлашгани бизни ҳайратга солди. Йигитлар машҳулот лагери даврида ҳам ўз уйида тунашга кўниккан экан. Интизом борасида ҳам анчагина ишлашга тўғри келди. Баъзан футболчилар учрашув олдидан 10-20 дақиқа телефонида ўйин ўйнаб ўтирарди. Кейин тушлик вақти ва кийим алмаштириш хонасида телефон ишлатишни таъқиқладик. Йигитлар майдонда бир бирини яхши тушуниши учун ўзаро кўпроқ мулоқот қилишини кўзлаб, шундай қилдик.
Биз 20-25 нафар тули шахслар билан ишлаймиз. Уларни бир ғоя остида бирлаштириш энг аввало сабр-тоқат, ишонч ва очиқликни талаб қилади. Бошида ҳимояланишдан бош тортган ҳужумчилар бўлди. Уларга нима учун ҳимоя ҳақида ўйлаш муҳимлигини, ҳимоячилар эса ҳужумга ўтиши нега зарурлигини батафсил тушунтириш учун алоҳида вақт ажратилди. Бу жараёнда агар улар айнан мана шу йўлдан кетса, охир-офибат муваффақият келишини ҳис қилиши ҳам мумкин эди.
Бошида биз тўрт ҳимоячи билан ўйнардик. Вақт ўтиши билан уч ҳимоячи билан ҳаракат қилиш яхшироқ ечим эканини тушуниб етдик. Бу ўзгариш жуда кўп қўшимча машғулотлар, видеотаҳлиллар хонасида бир қанча тунларни ўтказишимизга сабаб бўлди. Энди эса, бунинг натижаси кўз ўнгимизда.
Мураббий жамоада ўзгача руҳ пайдо бўлганини сезади. Ана шу руҳият кейинроқ яққол намоён бўлди. Масалан, ўша хусусият Қирғизистон билан ўйинда кузатилди. Биз икки бор ҳисобда ортда бордик, шунга қарамай, вазиятдан чиқа олдик ва 3:2 ҳисобида зафар қучдик. Бутун саралаш жараёни давомида ўз кучимиздан шубҳаланмадик, ҳар доим мўъжиза ярата олишимизга ва орзуни ҳақиқатга айлантиришимизга ишондик.
Илгари Ўзбекистонда дзюдо ва бокс натижалар бўйича биринчи рақамли спорт тури бўлган. Лекин футболдаги ютуқлар рейтингнинг ўзгаришига олиб келяпти. Менга илгари миллий терма жамоа бўш стадионларда ўйнаганини айтишди, ҳозир эса уй учрашувларига 30 минглаб одам келяпти. Беллашувлар телевидение орқали жонли тарзда эфирга узатиляпти. Мен ўзбек футбол ишқибозлари италиялик фанатлар сингари иштиёқи баланд эканини кўрдим.
“Рома” ҳужумчиси Элдор Шомуродов ва “Манчестер Сити” ҳимоячиси Абдуқодир Ҳусанов мутлақ юлдузлар. Ҳозир меҳмонхоналарда бизга қўриқчилар керак бўляпти. Чунки бу икки ўйинчини кўриш учун юзлаб мухлислар келяпти. Болалар Лионель Месси, Криштиану Роналду ёки Килиан Мбаппени эмас, балки Шомуродов ва Ҳусановнинг футболкаларини кийиб юрибди.
Элдор ва Абдуқодир шунга қарамай, камтарлик ва хокисорлигини сақлаб қолган ўйинчилардир. Улар шу даражада машҳурки, болалар уларга қараб, меҳнат, иштиёқ ва интизом билан ўзбек футболидан чиқиб, жаҳон даражасидаги клубларда ҳам ўйнаш мумкинлигини кўриб турибди. Мен Европанинг кўплаб клублари Ўзбекистон миллий терма жамоаси ўйинчиларига эътибор қаратиши зарурлигига аминман.
2002 йилги жаҳон чемпионатида Словения терма жамоасидаги дўстларим учун ҳам, мен учун ҳам ишлар биз кутган даражада яхши кетмаган эди. Мен хотира учун учта футболкани сақлаб қўйганман. Мен йигитлар ҳар бир ўйиндан роҳат олишини истайман. Жаҳон чемпионатининг финал қисмида иштирок этиш, футболчи фаолиятининг чўққиси ҳисобланади. Шунга қарамай, биз АҚШга аниқ мақсад билан борамиз. Биз гуруҳ босқичидан ўтмоқчимиз. Агар Германияга дуч келсак, уларни енгишни хоҳлаймиз. Аргентина, Бразилия ёки қолган рақибларга ҳам муносабат худди шундай. Биз Ўзбекистон номини муносиб намойиш қилишни истаймиз, - деди Алеш Чех.
Эслатиб ўтамиз, навдатдаги жаҳон чемпионати 2026 йилнинг 11 июнидан 19 июлига қадар АҚШ, Мексика ва Канада мезбонлигида ўтказилади. Бу гал мусобақа таризхида илк бор дунёнинг энг кучли 48 та миллий терма жамоаси ғолиблик учун куч синашади.
Айни пайтда, учта мезбондан ташқари яна ўнта мамлакат вакиллари саралаш турнирларида муваффақиятли қатнашиб, мундиал йўлланмасини қўлга киритди. Улар орасида Ўзбекистон миллий терма жамоаси ҳам бор.
Comments