Жалолиддин Машарипов "негатив" мухлисларга ва танқидларга кескин жавоб берди

Ўзбекистон Миллий терма жамоаси ва Эроннинг "Истиқлол" клуби футболчиси Жалолиддин Машарипов мухлисларнинг эътирози ва салбий фикрларига муносабат билдирди.

Ўзбекистонлик мухлислар ўртасида термамиз Қатарга қарши ўйинни сотган каби фикрлар янграй бошлади. Футболчи ўз инстаграм саҳифаси орқали бу каби фаразлар хато эканлиги айтиб, мухлисларни қизиқтирган саволларга жавоб берди. 

- Бизни номимизни қоралаб ижтимоий тармоқларга видео тайёрлаб, обуначи йиғадиганлар ҳам бор. Буни ўрнига меҳнат қилишингизни сўраб қоламан. Агар менга эътирозингиз бўлса ёки жиддий гаплашиб олмоқчи бўлсангиз, инстаграм орқали хабар қолдиришингиз ёки бирор ерда кўришиб оламиз, деб таклиф билдирсангиз, мен бунга қарши эмасман. Шундай мухлислар бор бизни доимо қўллаб-қувватлайди. Бахтсиз одамлар эса қоқилишимизни кутиб юради.

- Терма жамоамиз чемпионатни мағлуб бўлмай тарк этди. Пенальтилар серияси бу - лоторея. Тўғри, бизнинг режа кучли тўртликка кириш эди. Айримлар бизни футболни яхши кўрмасликда айблади. Аслида, бизда ҳам гап кўп. Биз ҳам қўлимиздан келган ишни қиламиз. 

- Футболчилар жаҳон чемпионатида ўйнашни ёки Ўзбекистонни Жаҳон чемпионатига олиб чиқишни хоҳламайди, деб ўйлайсизми? Сиз жамоадаги ички муҳитни билмайсиз-ку? Футболчилар гапирмайди деб, камера ортида хоҳлаган гапингизни айтяпсиз. Менимча, биз жим бўлганимизни қўрқоқлик, деб ҳисоблайсизлар, шекилли. 

- Ота-она ҳамда ватан ҳеч қачон сотилмайди. Шунинг учун, биз ватанни сотиб, уйимизга нон олиб кирмаймиз. Бизга ҳеч кимни пули керакмас. 

Шомуродов, Алижонов, Алиқулов каби футболчиларимизда жароҳат олмаганида, ҳаммаси бошқача бўларди. Таркибда шу каби муҳим ўйинчилар бўлмаган ҳолатда ҳам яхши иштирок этдик. Бизни қўллаб-қувватласангиз, насиб этса, Жаҳон чемпионатига чиқамиз. 

Одамлар менинг юриш-туришимга қараб баҳо беради. Менинг кийинишимга қараб, кибрли дейишади. Мени танимай туриб, қандай ёмон кўришлари жуда қизиқ. Шу каби гапларни айтаётганлар мен билан ҳаётда учрашмаган ва гаплашиб кўрмаган. 

Қатар биздан жисмонан кучли эди, демаган бўлардим. Шунчаки, серияда омади келди. Ҳаттоки Эрон ўйинда ютқазиб чиқиб кетди. 4-5 та асосий футболчиларимиз таркибда бўлганида, ҳаммаси бошқача бўларди. 
 


                                                                                                                         Карим Худайқулов тайёрлади