“Жалолиддинов “Локо” кўрсатаётган футболга ярамайди!”

“Рубин” клубининг собиқ спорт директори, юртимизда фаолият юритган Муҳсин Муҳаммадиев Москванинг “Локомотив” жамоасига кўчиб ўтган 18 ёшли Жасур Жалолиддинов ҳақида ўз фикрларини билдириб ўтди.

- Мен Ўзбекистонда ишладим ва Жасурни майдондаги ишларини кўрдим. Ўз юртида у энг истеъдодли ўйинчилар қаторига киради. Тезкор ва техникаси кучли футболчи. Лекин менинг фикримча, у ҳозир “Локомотив” қураётган ўйин услубига тўғри келмайди. Бу 1990 йиллардаги “Спартак” жамоасига тўғри келадиган ярим ҳимоячи. “Локомотив”га ҳозир шиддатли ва жисмонан бақувват футболчилар керак.

Жалолиддинов Жоау Мариудан устун бўла оладими? Бу ноўрин таққослаш. Бу ҳақида нима дейишни ҳам билмайман, - деди Муҳсин Муҳаммадиев.

Тан олиш керакки, Жасур Жалолиддиновнинг “Локомотив”га трансфери анча шов-шувли бўлди. У Италиянинг “Беневенто” жамоасида малака оширганидан буён қатор клублар эътиборини қозонган эди. Ўзбек футболчисига “Локомотив” қаторида Португалиянинг “Бенфика”, Италиянинг “Удинезе”, “Беневенто”, Туркиянинг “Бешиктош”, Испания ва Осиёнинг қатор клубларидан қизиқиш бўлаётганини агенти Юрий Белоус айтиб ўтганди.

Жасур қатор клубларнинг нишонига тушишида The Guardian экспертлари томонидан ўз ёшида дунёнинг энг яхши 60 нафар футболчиси рўйхатига киритилгани ҳам таъсир қилган. Дарҳақиқат, “Бунёдкор” футбол клуби тарбияланувчиси 2002 йилда туғилган футболчилар ўртасида Осиёда энг кучли бешликка киради.

“Бунёдкор” асосий таркибида 16 ёшу 80 кунлигида дебют қилиб, Ўзбекистон миллий чемпионатларида тўп сурган энг ёш футболчи сифатида тарихга кирган Жалолиддинов бу жамоа учун жами 32 та учрашувда 3 та гол урган. 2020 йилда Ўзбекистон терма жамоасида дебютини ўтказган.

Жасур Жалолиддиновнинг трансфери учуни “Локомотив” 1 миллион евродан зиёдроқ маблағ сарфлади ва ҳамюртимиз билан беш йиллик шартнома имзолади. Яқинда Ўзбекистон Профессионал лигаси раҳбариятининг ушбу трансфер бўйича турли гумонларни билдирди. Масала ўрганилиб, шубҳа-гумонлар бартараф  этилмагунича клуб янги ўйинчисини рўйхатдан ўтказа олмади. Бу муаммо барҳам топиши билан Москва клуби Жасурни Россия премьер-лигаси қайдномасидан ўтказди. Футболчи олтинчи турда “Зенит”га қарши ўтказилган учрашувга жалб қилинган ўйинчилар рўйхатига киритилди ва ўйинни захира ўриндиғидан кузатди.

Энди Жасур Жалолиддинов “Локомотив”да дебютини ўтказиб, нималарга қодирлигини исботлаши қолди холос.

Трансфер можароси бартараф этилган. Жалолиддинов дебютини қачон кўрамиз?

Миранчук Италияга кетяпти. Энди Жалолиддиновга жой очиладими?

Жасур Жалолиддинов премьер-лигада тўп суриш ҳуқуқига эга бўлди

Жалолиддинов трансфери машмашаси Россияда ҳам акс садо бермоқда. Агент бор гапни айтди!