Трансфер можароси бартараф этилган. Жалолиддинов дебютини қачон кўрамиз?
Россия премьер-лигаси олтинчи турининг марказий учрашувида вице-чемпиони – Москванинг “Локомотив” жамоаси ўз мухлислари кўз ўнгида амалдаги чемпион “Зенит”ни қабул қилади.
Ушбу учрашувда пешқадамлик масаласи ҳал қилинади. Агар меҳмонлар ғалаба қозонса, Остон Ўруновнинг жамоаси – “Спартак”дан биринчи ўринни қайтариб олади.
Бироқ, “Локомотив” ўз майдонида фақат ғалаба учун ўйнайди. Бошқа чораси ҳам йўқ. Марко Николич шогирдлари ўтган гал ўз майдонида кутилмаганда “Ахмат” жамоасига 2:3 ҳисобида ютқазиб қўйган. Энди мамлакатнинг энг кучли жамоасини енгиб, мухлислар ишончини қайтариш лозим. Қолаверса, “Локомотив” ҳозирча етти очко билан ўнинчи ўринда бормоқда. Чемпионлар лигасида мунтазам иштирок этишни мақсад қилган жамоа учун мусобақа жадвалининг ўрта қисми бутунлай бегона бўлиши керак. Вазиятни ўнгламаса бўлмайдиган ҳолат.
Ўтган йилги натижалар бўйича ижобий статистика “Локомотив” фойдасига ҳал бўлган. Москваликлар ўз майдонида 1:0 ҳисобида зафар қучиб, рақиб майдонида гол урилмаган учрашувдан бир очко билан қайтган.
Ушбу учрашувнинг ўзбекистонлик мухлисларга аҳамиятли томони Жасур Жалолиддинов билан боғлиқ.
“Локомотив” ўзбек футболчисининг трансфери бўйича кутилмаганда юзага келган муаммони бартараф этмагунича ҳамюртимизнинг хизматларидан фойдалана олмай келаётган эди. Ушбу муаммо Ўзбекистон Профессионал футбол лигаси раҳбарияти трансфернинг барча қоидаларга амал қилинганига шубҳа билдиргани учун суриштирув ўтказилиши лозимлиги айтилганидан кейин вужудга келди.
“Локомотив” ва “Бунёдкор” бу трансфер бўйича барча тушунмовчиликларга барҳам берди ва москваликлар куни кеча Жасур Жалолиддиновни Россия премьер-лигасида қайдномадан ўтказди. Россия премьер-лигасида жорий қилинган қоидага биноан, бир жамоа таркибида 8 нафардан ортиқ легионер рўйхатдан ўтказилишига йўл қўйилмайди. “Темирйўлчилар” лимит ичидаги сўнгги бўш жойни айнан ўзбекистонлик легионер учун сақлаб тургани бош мураббий Марко Николич мавсум давомида Жасур Жалолиддиновдан фойдаланишни кўзлаётганидан дарак беради.
Айни пайтда 18 ёшли легионеримиз Жасур Жалолиддинов Россия премьер-лигасида тўп суриш ҳуқуқига эга. Буёғига футболчимизнинг мураббийлар штаби ишончини қозониб, ўйинда иштирок этишга лойиқлигини исботлаши қолди. Биз эса кутилган дебют бугун нишонланиши тарафдоримиз!
Фикрлар