"Jamoa bilan kelishdik va shartnomani bir yilga uzaytirdik". Legionerimiz hech qaerga ketmaydi

O‘tgan yilning yozida “Neftchi”dan Malayziyaning “Terenganu” klubi safiga ko‘chib o‘tgan hamyurtimiz Nurillo To‘xtasinov o‘tgan vaqt mobaynida o‘z klubiga ishonchli futbolchilardan biriga aylandi.

Legionerimiz 17 ta o‘yinda maydonga tushib, raqiblar darvozasiga 3 ta gol urdi. U faoliyatini yana O‘zbekistonda davom ettirishi mumkin degan, xabarlar chiqqandi. Bu borada Sports.uz jurnalisti futbolchi bilan bog‘landi.

- Nurillo Malayziyadagi debyut faoliyatingiz qanday kechdi? O‘zingiz kutgandekmi yoki nimadir o‘xshamadimi?

- Malayziyaga kelganimda bu erda meni juda yaxshi kutib olishdi. Debyut o‘yinim ham nihoyatda ajoyib o‘tdi. Xuddi o‘zim kutgandek bo‘ldi.

- Ko‘pchilik sizni yangi mavsumdagi rejalaringiz bilan qiziqayotgandi. Qanday qarorga keldingiz?

- Men yana “Terenganu” klubida qolaman. Jamoa bilan kelishdik va shartnomani yana bir yilga uzaytirdik.

- Malayziya chempionatida sizga eng yoqqan narsa nima bo‘ldi?

- Malayziya chempionatida menga yoqqan narsa marketing, media va muxlislar ancha rivojlangan. O‘yinlarni juda yaxshi qo‘llab-quvvatlashadi.

- Adashmasam, "Terenganu"da hozirga qadar 16 ta o‘yinda maydonga tushdingiz va 3 ta gol urdingiz. Ushbu statistik ko‘rsatkich sizni qoniqtiradimi?

- Yo‘q. Xudo xohlasa, bundan-da ko‘proq gol urib, jamoamga yordm beraman.

- Legioner sifatida to‘p surishni boshlagach, o‘zingizda birinchi navbatda qanday o‘zgarishni sezdingiz?

- Legioner sifatida to‘p surish menga har tomonlama foyda keltirdi. Baribir legioner bo‘lib o‘ynash boshqacha bo‘larkan.

- U erda qolishga qaror qilganingizdan kelib chiqsak, barchasi sizni qanoatlantiryaptimi?

- Meni bu erda qolishim Xudo xohlasa aniq bo‘ldi. Albatta, yaratib berilayotgan barcha shart-sharoitlar meni qoniqtiryapti.

Shuhratbek Jo‘raev.