Jamshid Saidov yana "Buxoro" bosh murabbiyiga aylanadimi?

Futbolchilar maqomi va o‘tishi bo‘yicha qo‘mita "Buxoro" bosh murabbiyi Jamshid Saidov bo‘yicha qaror chiqardi. Bu haqda O‘zbekiston Professional futbol ligasi bosh direktori vazifasini bajaruvchi Diyor Imomxo‘jaev ma’lum qildi.

"Jamshid Saidov bilan mehnat shartnomasining bekor qilinishi amaldagi mehnat qonunchiligi va reglament talablariga zid ravishda amalga oshirilgan, deb topildi. Shundan kelib chiqib, qo‘mita o‘z vakolati doirasida bosh murabbiyni ishga qayta tiklash bo‘yicha "Buxoro" klubiga tavsiya berdi. Agar Saidov 12 fevral kuniga qadar ishga tiklanmasa, u bilan imzolangan mehnat shartnomasiga ko‘ra, "Buxoro" kompensatsiya to‘lab berishi shart.

Ma’lumot uchun, Jamshid Saidovning shartnomasi 2022 yilgi mavsum so‘ngiga qadar amal qilishi kerak edi. "Buxoro" esa, shartnoma shartlariga zid ravishda, bosh murabbiyni ishdan oldi. Agar klub Saidovni ishga tiklamasa, uning 2022 yil 31 dekabr kuniga qadar bo‘lgan maoshlarini to‘liq to‘lab berishi kerak bo‘ladi", - dedi Imomxo‘jaev.