Жангда Карим ғалаба қозонди ёхуд "Ал-Иттиҳод" бош мураббийининг истеъфоси ҳақида!

АПЛнинг "Вулверхэмптон" жамоасида муваффақиятли ишлаганидан кейин Нуно Эшпириту Санту 2021 йилда "Тоттенхэм" таклифини қабул қилиб, "шпорлар" бош мураббийига айланди. Лондондаги ўта омадсиз фаолиятдан кейин мутахассис ярим йилдан кўпроқ вақт ишсиз юрди. 2022 йилнинг ёзида эса Нуно "Ал-Иттиҳод" бош мураббийига айланди (ҳали Роналду Саудия келмаган пайтлар). Ўша даврда бу чемпионат ҳозирги мавқега эга бўлмаган, асосан ўз жамоасига керак бўлмай қолган футболчиларни сотиб олишга уринадиган клублардан ташкил топганди. Хуллас, Сантунинг Жиддадаги илк мавсуми ажойиб ўтди. Клуб СПЛда чемпионликни қўлга киритди, Осиё Чемпионлар лигасига қайтди ва клублар ўртасидаги Жаҳон чемпионатига йўл олди. Шунингдек, бир мавсум давомида лигада 2 марта мағлуб бўлган жамоа 72 очко тўплашга муваффақ бўлди. Умуман олганда, Сантунинг ишлари беш эди, токи клубга янги юлдузлар келмагунча. Хабарингиз бор, яқиндагина "Ал-Иттиҳод" Сантуни ўз лавозимидан озод қилди. Бунга жамоанинг сўнгги пайтлардаги салбий натижалари важ қилиб кўрсатилаётган бўлсада, айрим нашрлар аслида бошқа сабаблар борлигини таъкидламоқда...

2023 йилнинг ёзги трансферлари аввалгиларидан анча фарқ қилди. Яъни Саудия клублари Европанинг катта юлдузларини ўз таркибига қўшиб олишни бошлади. Бунга Роналдунинг "Ан-Наср"га келиши туртки бўлди. Шунингдек, "Ал-Иттиҳод" ҳам жим қараб тургани йўқ. Жамоа Н'Голо Канте, Жота, Фабиньо ва Луис Фелипе каби футболчилар билан шартнома имзолади. Энг йирик трансфери эса Карим Бензема ҳисобланади. "Олтин тўп" соҳиби "Реал"ни тарк этиши кутилмаган воқелик эди. Унинг фаолиятини Саудияда давом эттириши эса, шов-шувларга сабаб бўлди. 

Карим "Ал-Иттиҳод" сафига келиши биланоқ мураббийлар билан муаммолар бошланди. Маълум бўлишича, Санту раҳбариятдан бу трансферни сўрамаган, чунки португал ўз услубига Бенземани тушмайди, деб ҳисоблаган. Шу билан бирга, ҳужумчи сардорлик боғичини ҳам сўраган. Аммо Санту уни капитан бўлишини истамаган. Карим янги клуби иштирок этган Араб Чемпионлар лигасидаги голлари билан зиддият борасидаги миш-мишларни камайтирди, лекин бу нарса вақтинчалик бўлиб чиқди. 

"Ал-Иттиҳод" Осиё Чемпионлар лигасининг 4-турида "Эйр-Форс" меҳмони бўлиб, 2:0 ҳисобида мағлуб бўлди. "Al Riyadiah" нашри хабар беришича, танаффус пайтида яна зиддият келиб чиққан. Ўша пайтда Санту Бенземага қарата: "Сен зўр футболчисан, лекин прессингда жуда нўноқ ҳаракат қиляпсан", - деган. Карим эса: "Фақат мен билан эмас, бутун жамоа билан гаплашинг", - дея жавоб қайтарган. Ушбу баҳсдан кейин 49 ёшли мутахассис истеъфога чиқарилди. Манбанинг таъкидлашича, Бензема раҳбариятга бу мураббий билан узоққа бориб бўлмаслигини айтган ва уни ишдан бўшатилишини сўраган. Саудияда юлдузларни гапига қараб иш тутилиши янгилик эмас. Аввалроқ, Роналду билан шундай иш бўлганди. 

"Ал-Иттиҳод" айни пайтда ўзига янги бош мураббий изламоқда. Миш-мишларга кўра, вариантлар ичида Альфред Шрёдер, Лоран Блан, Хулен Лопетеги ва Жозе Моуриньо каби мутахассислар бор.